في يوم المسامحة العالمي، العالم كله بيحتفل النهارده بقيمة مهمة في حياتنا، هتخلينا أحسن في إحساسنا بنفسنا مش بس في علاقتنا باللي حوالينا. المسامحة أكيد حاجة مهمة ومش مجرد جملة كليشيه بتتقال من صغرنا ويتعمل عليها نشيد، الموضوع أكبر من كده، الكلمة دي ليها معنى كبير جدًا، بس هل لازم فعلًا نسامح كل اللي في حياتنا مهما أذونا علشان نعيش بقلب أخف زيّ ما الناس بتقول؟
مؤخرًا، انتشرت مناقشات عن إن الإنسان لما بيسامح، فهو بيخدم نفسه أولًا، علشان لما هتسامح أنت اللي هتبقى أخف، مش هتعيش وجواك طاقة كراهية أو أي حاجة من دي، هتحاول تنسى أي أذى تسبب فيه حد في حياتك، أو بمعنى تاني حد كان في حياتك، وهتعيش بقلب متسامح وحابب الناس ومُقبل على الحياة.
لكن ده أثار تساؤل؛ هل لازم نسامح كل اللي أذانا؟ وغير كده هنبقى احنا اللي بني آدمين وحشين؟ الفكرة دي حطت ضغط نفسي أكبر على الناس اللي وقعوا تحت تأثير أذى حصلهم في حياتهم، يعني أبقى مأذية وكمان أنا اللي وحشة ومابعرفش أسامح؟
الموضوع مش بالسوء ده، لو أنت بتفكر فيها من ناحية إن الدنيا مش دايمة، ومفيش حاجة مستاهلة، ممكن تحس فعلًا إنه عادي تسامح أي حد، وتتخطى أي موقف، لإن اللي باقي من الإنسان مجرد ذكرى، ليه نبوظها؟
الموضوع كله بيرجع ليك أنت، ولإحساسك، ودي حاجة ماينفعش يبقى لها قاعدة واحدة تتعمم، لكن دي حاجة نسبية بتختلف من شخص للتاني ومن موقف للتاني، يعني ممكن اتنين يتحطوا في نفس الموقف، وكل واحد فيهم يحس إحساس مختلف، فماينفعش نطبق عليهم نفس القاعدة، أو نقلل من إحساس واحد فيهم ونقول له أنت مكبر الموضوع، طالما احنا مش الشخص ده، هو بس اللي يحدد.
ماينفعش نتحط تحت ضغط “سامح علشان تعيش”، طب افرض أنا مش قادر أسامح؟ يبقى العيب مني كمان؟ أكيد دعوة نشر التسامح مهمة، بس من غير ضغط، من غير ما نحسس الناس إن اللي حصل لهم ده ولا حاجة.
وغير التسامح، في فرق بين فكرة المسامحة وبين التخطي أو التجاوز، يعني حتى لو قدرت تسامح، مش شرط تقدر تتجاوز أو تتخطى اللي حصل وتمسحه من ذاكرتك ومن حياتك، ممكن مجرد الذكرى نفسها تكون بتؤذيك بمجرد ما تخطر على بالك مرة تانية، يعني ممكن تسامح شخص بس ماتقدرش ترجع تتعامل معاه أو تعتبر إن الأذى اللي حصل ده كإنه ماحصلش وعملنا له Ctrl+z، المسامحة مش معناها تأشيرة دخول وإن ماحصلش حاجة عادي. ممكن تسامح وتفضل متمسك بفكرة إن الأشخاص دول ماينفعش يفضلوا في حياتك، وممكن تلاقي إنك عادي قادر تتعامل معاهم.
الفكرة إن في الأول وفي الأخر ده قرارك، أنت اللي هتقدر تحدد حياتك عايز تمشيها ازاي ومين يبقى موجود ومين لأ، ومسامح في حقك تجاه اللي ظلمك قبل كده ولا لأ، شايف إن ده “ظلم” بالنسبة لك من الأساس ولا لأ. ماحدش يقدر يقرر غيرك، وماحدش يقدر يقرر لك.