للسحور الأخير: عربيات فول هي الكبيرة في منطقتها

الخليفة الفاطمي الحاكم بأمر الله خلى الفول وجبة أساسية يبدأ بيها المصريون يومهم، وكان وقتها بيدي بياعه اللي بيجرها بعربية في الشارع ذهب بشكل سنوي، تعويضًا له على اللي بيعانيه من تعب في التحضير ولف بين الأحياء، ويمكن ده اللي خلى لحد دلوقتي الفول من على العربية مايتقارنش بأي فول تاني وده طبعًا بالإضافة لمتعة الأكل في شارع لوحدها، وفي سحور رمضان المتعة بتزيد أكثر وأكثر… وعلى رأي حنون “لازم نلحق وشق القدرة لأنها حاجة بسم الله ماشاء الله … كريمة”

عم سعد الحرامي

الراجل ده اتعمل عنه وثائقيات كونه أشهر واحد بتاع فول في مصر كلها، ليه قصة ورحلة كفاح واسمه “سعيد الحرامي” كمان له قصة فريد شوقي له علاقة بيها، بس علشان مانحرقهاش ليكوا شوفوا الفيلم الوثائقي اللي اتعمل عنه، عم سعيد موجود في وسط البلد من أكثر من 30 سنة في تقاطع شارع شامبليون مع شارع محمود بسيوني قريب ميدان التحرير، وكان بيروح له فنانين كتير منهم خالد الصاوي وأشرف عبد الباقي.

حمادة شيراتون

دراسته للصيدلة ولقب “الدكتور” ماكانش عائق لقرار حمادة في إنه يحقق حلمه بعربية الفول التي كانت فاتحة خير عليه، ومن نجاح لنجاح فتح مطعمه بس فضل محتفظ بعربية الفول وخلى تصميم المطعم على شكل عربيته الأولى، وبيبقى زحمة في العادل وأزحم في رمضان مع افتكاسات جديدة، وعنوانه في مساكن شيراتون المطار، مصر الجديدة.. ولتفاصيل أكتر عن أرقامهم أو المكان من هنا

عم عطية

@luther242

#عربية_فول #عربية_فول_رمضان #فول_مدمس #طعمية

♬ Ramadan Kareem – TonsTone

عم عطية صاحب أطباق الفول بتاعت زمان وبيوت زمان، لو كنت متعود تروح له هتلاقيه بيسألك على طول “فول بالأونيون” اللي هو البصل، أو شوية بريد (عيش) وبوتاتوس (بطاطس) مشهور بيه وبـالفول بالزيت الحلو أو الحار، العنوان ظهر جراند مول المعادي في شارع 250 عند المزلقان، بس خلي بالك لو في الأيام العادية غير رمضان بيشطب بدري بدري فمحتاج تصحى له مخصوص علشان تلحق الفول وتلحق تشوف ضحكة عم عطية، ولتفاصيل أكتر عن مكانه من هنا

الجحش

أشهر واحد بيعمل فول بالخلطات في منطقة السيدة زينب، لو كنت قديم عنده هتبقى حافظ طقوس المكان وتقاليده، مفيش حاجة عنده اسمها الناس والزباين يقعدوا ساكتين، لأنك هتلاقي اللي بيوزعوا لك الأكل بيوزعوا معها نكت وقفشات، ويقال انه اتسمى بالجحش لأن صاحبها كان بمثابة العلاف الأول وهو حنفي الجحش، هتلاقي مكانه في 44 شارع مارسينا السيدة زينب.

عبده الدولار

صاحب مقولة ” الزبون دايمًا على حق ” من أهم عربات الفول في القاهرة وهو بيقدم تحويجة مميزة مش عارفين مصدرها إيه خلته من أشهر مقدمين طبق الفول، هتلاقيه في عين شمس في شارع سليم منطقة النعام وتفاصيل أكتر عن العنوان من هنا

عم محروس

وتعتبر العربة الأكثر شعبية في جاردن سيتي جنب مسرح السلام في شارع محمد محمود، بيجي له المصريين والأجانب الميزة عنده بقى غير الفول أنه ملك البيض المدحرج، وأطباقه كده معروفة بالشياكة شبه روح المكان اللي موجود فيه، وتفاصيل عن عنوانه من هنا.

عم حمدي

@osamaosos712

عربيه فول عم حمدي موجوده بشارع الفلكي امام عماره ٦٣ وجنب الجمعية الاستهلاكية. القاهره وسط البلد #يوميات_مواطن_مصري #يوميات_ست_مصريه #مصر🇪🇬 #القاهره_مصر__ #مصر

♬ الصوت الأصلي – يوميات مواطن مصري 🇪🇬

عم حمدي في شارع الفلكي في وسط البلد من جهة صبري أبو علم، معروق بأقواله المأثورة ” كل بائع وليه طبخته ” ماعدنوش طبق محدد الزبون اللى يجى النهارده يطلب فول بالبيض ممكن بكره يطلب فول سادة، وبعده يطلب فول بالزيت الحار .

عمو وحيد

في رمسيس جنب محطة مصر ورا مستشفى القطبي معروف بافتكاساته زي صوابع البطاطس بالجمبري، مافيهاش جمبري ولا حاجة بس شكلها زيه، وكل الناس بتيجي مخصوص علشانها، ومشهور بمقبلاته اللي بتفتح نفسك أكثر وأكثر زي مياه السلطة والباذنجان المقلي والمعلم عنده فول بالسمنة وبيتزا البيض.

آخر كلمة: ماتفوتوش قراءة: هتاكل المكشوفة ولا هتغرق مع المعكوسة: حلويات رمضان السنة دي عايزة مننا إيه؟