وصفات مختلفة للمكرونة بلمسات عربية

Image processed by CodeCarvings Piczard ### FREE Community Edition ### on 2022-01-14 16:26:01Z | |

الباستا أو المكرونة اختلفوا على أصلها، وأيًا كان هي جت منين، عنصر مهم زيّ ده في الأكل ماكانش هيعدي من تحت إيد العرب من غير ما يحطوا لمساتهم الخاصة عليه، سواء بالمقادير أو التوابل أو بإضافة المكونات.

وفي اليوم العالمي للمكرونة، جبنالكم وصفات مختلفة لها بلمسات عربية.. ورقة وقلم واكتبوا معايا.

المبكبكة

عن: طريقة

 المبكبكة الليبية من أشهر أكلات الوطن العربي، وقربت تبقى تراث ليبي من كتر ما بيعتبرها الشعب الليبي أكلة أساسية، اتسمت بالاسم ده لإن وهي بتستوي بتظهر على سطحها فقاعات وبتسمع صوت بكبكة، بيعتبروها من الأكلات الاقتصادية نوعًا ما، وسهلة في طريقتها لإنها بتتطبخ كلها في إناء واحد، وأكلة دسمة بيحبوا ياكلوها في الشتاء علشان بتدفي وسعراتها الحرارية عالية.

في أقوال بتقول إن الأكلة أصلها أيطالي في وقت ما كانت إيطالية محتلة ليبيا، بس الليبيين هما اللي طوروها وغيروا فيها كتير لحد ما بقت أكلة ليبية خالصة.

بالنسبة للطريقة، فبنجيب كيلو مكرونة وكيلو لحمة وبصلتين مفرومين وفلفل أخضر وفلفل أسود، وبهارات للحمة ومعلقتين من معجون طماطم ومعلقتين سمنة ومياه سخنة. بعدين بنجيب طنجرة أو إناء نحط فيه سمنة ومن بعدها قطع اللحمة ونشوحها مع البصل ونقلبه لحد ما لونه يبقى دهبي، ونضيف معجون الطماطم عليها والبهارات والملح والفلفل، وبعدين نضيف المياه السخنة لحد ما تغطيهم ونستنى لحد ما اللحمة تستوي، والخطوة الأخيرة هتبقى المكرونة، هنضيفها من غير سلق ونقلبها ونسيبها لحد ما تستوي في الصلصلة، وبالهنا والشفا.

الرشتة

بتتفق الدراسات والأبحاث التاريخية عن المطبخ الجزائري في إن طبق الرشتة من أقدم الأكلات الشعبية في الجزائر، بس اختلفوا على تاريخها، في اللي بيقول إن “ابن خلدون” هو أول من اكتشف الأكلة، وفي دراسات تانية بتقول إنها رمز خاص بالمطبخ الجزائري.

أكلة شعبية قديمة بنلاقيها في المناسبات حفلات الجواز أو في رمضان والعيد، الطبق في الأساس بيشبه الكسكسي والمفتول لحد كبير، بس بيستخدم نوع من المكرونة بدل الكسكس.

بالنسبة للطريقة، بنجيب دجاجة مقطعة ونص كيلو مكرونة وأربع حبات لفت وتلات بصلات ونص معلقة قرفة وفلفل أسود وحوالي 200 جرام من الحمص وننقعه قبلها بليلة، وكركم وملح وده اختياري و3 ملاعق زيتون، بنسلق المكرونة أو “الرشتة” عادي ونسيبها على جنب، وبعدين نضيف الزيت والدجاج والبصل والتوابل ونقلبهم، ونضيف المياه لحد ما تغطي الدجاج وبعد ما يتغلي بنضيف اللفت، وبنجيب المكرونة أو الرشتة علشان تتبخر فوق المرقة على نفس طريقة الكسكسي اللي بيتعمل في البيوت، وبعد ما الفراخ تستوي بنضيف شوية من المرقة على الرشتة ونضيف الحمص والبصل، وبتتقدم وبالهنا والشفا.

الحريرة بالمكرونة

عن: طبخ

الحريرة أشهر طبق شوربة مغربي، بتعتبر أساس المائدة الرمضانية، وبتتقدم في طبق دائري مع التمر و”الشباكية” (حلويات)، وجنبها الخبز السخن والبيض المسلوق، لها كذا طريقة ومنهم طريقة بتبقى المكرونة عنصر أساسي فيها.

نص كوباية عدس، وكوباية ونص حمص منقوع، بس لازم ننقعه على الأقل قبلها بليلة كاملة مع بيكاربونات الصوديوم، ونجهز 2 لتر مياه وطماطم متقشرة وبصل مفروم ناعم وحوالي كيلو ونص لحمة متقطعة لمكعبات، ومعلقتين من معجون الطماطم ونص كوباية زيت نباتي، بجانب المكرونة الاسباجيتي وكزبرة مفرومة وكرفس مفروم ومعلقة صغيرة زعفران ونص معلقة زنجبيل بودرة.

أما بالنسبة لطريقة التحضير، بنحمي الزيت على نار متوسطة ونضيف البصل واللحم، وبعدها ننزل عليهم بالحمص والطماطم المهروسة والتوابل، ونقعد نقلب شوية لحد ما المكونات تتماسك مع بعضها، ونسكب المياه ونسيبهم على النار لمدة 30 دقيقة، وبعدها نضيف معجون الطماطم ونسيبهم على النار ونضيف عليهم المكرونة، وقبل ما نرفعهم هنرش البقدونش والكزبرة ونزين الطبق بالريحان.

المكرونة واللبن

الوصفة دي موجودة في لبنان وسوريا، وطريقتها مافيش أسهل من كده، مافيهاش مكونات كتير، الزبادي أو اللبن كده كده مكون في الأكل الشامي، يعني تلاقي كوسة باللبن أو ورق عنب بسلطة الزبادي، فمن الطبيعي إن المكون ده تلاقيه بيتعمل مع المكرونة.

بالنسبة للمقادير، مكرونة أي شكل حسب الرغبة، وأربع فصوص توم مفروم، ولترين لبن زبادي، ونعناع مجفف هنحط معلقة كبيرة منه، ورشة ملح.

أما على طريقة التحضير، هنجيب مياه مغلية ونسلق المكرونة وبعد ما نصفيها وتبرد، نجيب إناء ونخلط فيه اللبن والتوم والملح والنعناع لحد ما يتداخلوا مع بعض، وآخر خطوة بنضيف المكرونة.

العزيزية

عن: food

العزيزية أو المكرونة باللبن، أكلة مصرية دمياطية حتى النخاع، من أخف الحلويات المصرية، والحلى الوحيد في قائمتنا النهارده فحبينا نختم بيه، بيقدموها في رمضان ومش بتاخد وقت في تسويتها، هنجيب كيلو لبن ومكرونة أي نوع ونسلقها نص سلقة، وكوباية إلا ربع سكر وكيس كريم شانتيه ومعلقة كبيرة جوز هند ومعلقة كبيرة زبيب وزيها نشا وزبدة أو سمنة حسب اللي بتفضلوه.

وبالنسبة للطريقة، بعد ما نسلق المكرونة ونصفيها من المياه، هنحطها في خلاط ونضيف عليها شوية لبن ونضربهم لحد ما القوام يبقى متجانس وناعم، وهنجيب إناء تاني على النار ونحط فيه اللبن والسكر والكريم شانتيه ونقلبهم على النار، وبعدها ننزل بالمكرونة على الخليط مع التقليب باستمرار لحد ما اللبن يغلي، وبعد كده نجيب النشا مع شوية مياه ونقلبهم على البارد ونضيفهم للخليط بتاعنا، ونفضل نقلب لحد ما القوام يبقى سميك ونرش شوية جوز هند.

هنجيب صينية وندهنها بالسمنة أو الزبدة من الأرضية والجوانب، ونضيف الخليط فيها ونفرده ونسيبه لحد ما يبرد تمامًا، وبعد كده ندهن الوش بالزبدة أو السمنة، وندخلها الفرن على الشبكة لحد ما تاخد لون من الأطراف، وبعدها نفتح الشواية علشان تاخد اللون الدهبي، وتتقطع وتتقدم، سر من أسرار العزيزية علشان تبقى زيّ اللي بتتعمل في المحلات هو اختيار اللبن، لازم يبقى عالي الدسم.

في النهاية، احنا مش مسؤولين عن الوصفات دي لو زيدتوا في الوزن أو الدهون، وياريت أصحاب القلوب الضعيفة يمتنعون.

آخر كلمة: ماتفوتوش قراءة: في يوم التغذية العالمي: ليه الأكل بالنسبة للعرب مش مجرد “سد جوع”؟

تعليقات
Loading...