المسلسلات في غير الموسم الرمضاني بقت متواجدة بشكل قوي، وبتنافس فيما يطلق عليه “الأوف سيزون” ومابقتش صناعة الدراما معتمدة فقط على الموسم الرمصاني، وفي الفترة الجاية هنشنهد إصدار عدد من المسلسلات المختلفة، منها أجزاء جديدة لمسلسلات حبيناها ومتحمسين للجديد منها.
اللعبة الجزء 5
من بداية انطلاق الجزء الأول و”اللعبة” محقق نجاح كبير والجمهور اتعلق بيه، وبيستنوا كل تحدي علشان يشوفوا الفريقين هيعملوا إيه، وبعد أربع أجزاء ماحسيناش بملل فيهم، مستنيين بفارغ الصبر الجزء الجديد.
في أخبار بتقول إن الجزء الخامس هيتعرض في الشهور القليلة الجاية، واحنا متحمسين من دلوقتي.
دواعي السفر
بتجربة جديدة لأمير عيد في التمثيل بعد مسلسل “ريفو” اللي حقق نجاح كبير، مستنيين “دواعي السفر” اللي أحداثه بتدور حول (إبراهيم)، اللي عايش في عالم من نسج خياله، لكن لما بيلاقي نفسه في موقف صعب، بيقرر تغيير حياته، وبيساعده في ده جاره الشاب (علي).
المسلسل هيبدأ عرضه من يوم 15 مايو الحالي، متحمسين نشوفه.
موعد مع الماضي
في إطار تشويقي، البطل بعد مرور 15 سنة على وفاة أخوه غرقًا، بيدور في أحداث وملابسات الوفاة، وأثناء رحلته بتحصل أحداث كتير بتوصل للانتقام، المسلسل بطولة محمود حميدة، أسر ياسين، صبا مبارك. وعادًة الجمهور بيتحمس للنوع ده من مسلسلات التشويق والجريمة.
البحث عن علا 2
بعد 14 سنة من رحلة “عايزة اتجوز” رجعتلنا “علا” علشان نعرف حياتها اتغيرت ازاي في السنين دي، رجوعها كان بلهفة للجمهور اللي حبها واتعلق بيها من 2010 -هي وعرسانها وعيلتها كمان- وبرغم التغييرات الكتير اللي حصلت في حياتها، وحتى بقى اسم المسلسل “البحث عن علا” هترجعلنا السنة دي بجزء تاني منه، يا ترى هيكون إيه اللي مستنينا؟
مفترق طرق
هنشوف كمان هند صبري في “مفترق طرق” بدور مختلف خالص عن “البحث عن علا”، المسلسل بيدور عن شخصية محامية زوجها بيدخل السجن بسبب فضيحة هزت الرأي العام، فبتقرر تدافع عنه من خلال عملها في مكتب محاماة، ولكن بتكتشف إن زوجها مايستحقش حبها، يا ترى إيه قضيته وازاي هتتعامل معاه زوجته؟