السنين عمالة تمر من وقت ظهور السوشيال ميديا، اللي معاها بقينا بنشوف حاجات غريبة، بيبقى نفسنا النت يفصل أول ما تيجي قدامنا، أشخاص بيشاركوا أدق تفاصيلهم اليومية بعشم زيادة وحب في المشاركة، المهم إن فرجتنا عليها مش هتعمل نقلة نوعية في العالم ولا حاجة، بس اتحشرنا فيها وبقينا نشوفها كل يوم.. طب احنا مالنا؟
حبينا نشارككم بقائمة بالعجائب والطرائف اللي مش محتاجين نشوفها على السوشيال ميديا تاني، ونتمنى لو قرر الشخص إنه يشاركها معانا ينقطع عليه النت قبل حتى ما يفكر.
وأنت بتحيي الحفلة مع المغني
وماله لما تحضر حفلات وتنبسط ويبقى كتر خيرك لو بسطتنا معاك وصورت لنا كام فيديو علشان نعيش الأجواء، بس عتابنا الوحيد “ليه بتسمعنا صوتك وأنت بتغني مع المطرب؟” ما تسيبنا نتسلطن زيك ونسمع كام أغنية حلوة، ليه بتعمل كده وأنت عارف إن مفيش أمل من إن حنجرتك تنافس عمرو دياب؟ وملحوظة صغيرة وأنت بتصور خمسين ألف ستوري (حالة) ماتصورهاش في الضلمة ولا مهزوزة علشان بنقعد نتخيل أجواء الحفلة.
وأنت بتثير الجدل بـ “جت سليمة”
بتعملوا كده علشان الحسد؟ ماينفعش جو التشويق وإنك تكتب جملتين زيّ “قدر ولطف” و”جت سليمة” و”الحمد لله على كل شيء” وتثير الجدل وتقلق الناس وتجري بعدها وتقفل تيلفونك، والناس ماتبقاش عارفة تطمن عليك ومخها يضرب أخماس في أسداس، طب أنت كويس؟ حد اتعور؟ عدد الإصابات قد إيه؟ أي بيان طلعهولنا زي اللي بنشوفه في الأخبار طمنا عليك.
وأنت بالكانيولا
ليه بنخض بعض يا جماعة، ده احنا كلنا ماشيين بعلاج.. المشكلة إني لاحظت الموضوع منتشر بشكل مبالغ فيه، واتعدى مرحلة إن حد يكون فعلًا تعبان وبيعمل كده، لما دورت علشان أحط صورة تعبر عن اللي بنقوله، لقيت كتالوج أختار منه مكتوب عليه “صور في المستشفى وكأنها لك” تشكيلة كده تقدر تستخدمها وقت الزنقة، صور لمحاليل على صور كانويلا، والأنقح من كده إني لقيت كانيولا وهمية بتتباع، ممكن تركبها علشان تعمل جو على السوشيال ميديا، أو زي ما قالت اللي بتبيعها: “علشان حبيبك يقلقك عليكي”.
وأنت بتصلي
دي بقى مرحلة من هوس السوشيال ميديا مش نتمنى إنها تقل، لأ تتمحي، أنا مالي يا لمبي بصورك وأنت بتصلي؟ بتدخلني في خصوصياتك أوي كده ليه؟ آه احنا عشرة عمر على السوشيال ميديا وكل حاجة بس العشم مايوصلش للدرجة دي.. بس يا ترى ده عشم فعلًا ولا رسالة مبطنة عايز توصل لها للجمهور؟
وأنت في لحظات انهيارك
مش بنقلل من وجع حد ولا من مشاكل أي شخص بيمر بها، وطبعًا لو حد مر بموقف صعب واتعرض لضرب أو في خطر يطلع ويفضح اللي عمل كده، وفي ناس دموعها بتخونها وهي بتتكلم ومش بتبقى مخططة لده.
بس احنا بنتكلم عن ناس تانية خالص، فئة بتطلع فجأة وبدون أي مقدمات وتصور نفسها وهي قاعدة على السرير بتعيط، والناس مش بتبقى فاهمة هو عيط فجأة وحب يشارك الجمهور اللحظة؟ ولا هو كان بيعيط من قبلها وحب يطلع يحكي عن الموضوع فاستحضر الحالة علشان يعيط؟
وأنت بتحب جديد
بيبقوا لسه متعرفين على بعض والدنيا تتملي قلوب على السوشيال ميديا “ملامحك كلها مني يادوب الاسم متغير” وينقلوا كل تحركاتهم وأحيانًا الموضوع بيوصل لتصويت الجمهور على اختيار لون السجادة.. طب راعوا شعور أصدقائكم السناجل والناس اللي لسه محشورة في الـ “موف أون” ومش عارفين يعدوا من المرحلة دي من أيام ألبوم (وأهي ذكريات).
لو عدينا لكم الحاجات اللي بتطلع لنا من كل حتة على السوشيال ميديا مش هنخلص.. فلقينا حل من الاتنين؛ إما نقطع عليهم وعلينا النت، وإما نعتزل حياة السوشيال ميديا ونرجع للطبيعة الصامتة.