حياتنا من غير مجاملات وكلام حلو هتبقى أرخم مما هي رخمة، بنشجع بعض نقول كلام حلو ومجاملات لطيفة علشان عارفين قد إيه بتفرق في نفسيتنا وممكن تخلي يومنا كله أحسن. بس يمكن ساعات كتير الموضوع بيفلت مننا ونسمع مجاملات غريبة كده، مش عارفين هل هي متأصلة في ثقافتنا العربية الشعبية ولا جبناها منين بس، مش هتفرق، عمومًا مش هنتسحل في أصل وفصل المجاملات، بس هنقف عند المجاملات الغريبة اللي نفسنا نبطل نسمعها.
الراجل اللي من غير كرش مايسواش قرش
وسط ما العالم كله بيتسابق على (السيكس باكس) والجيم وفورمة الساحل، بنسمع الجملة دي كده علشان تصبر اللي مش عارفين يوصلوا للفورمة. بس تقف عند الجملة ماتبقاش فاهم هل هي بتشجع الكرش ولا المقصود بها إيه، يعني كل الرجالة اللي من غير كرش وتاعبين نفسهم وصارفين على الجيم، كل دول مالهمش لزمة؟
القرد في عين أمه غزال
احنا عارفين طبعًا إن لما الواحد يبقى بيحب حد وبيعزّه بيبقى شايفه أحسن حد في الدنيا ومش بيشوف عيوبه، وبتبقى مراية الحب عميا وكده، ما بالك بقى بالأم، يعني مش مجرد حد بيحب حد، دي أقوى علاقة بين إنسان والتاني. طبيعي الأم تشوف ابنها أحسن واحد، بس مش لدرجة إنه يبقى قرد وتشوفه غزال.
بس اللي مش واخدين بالنا منه إن الجملة دي تنمر وإهانة واضحة وصريحة وماتعتبرش مجاملة، أنت بتقوله في وشه أنت قرد بس احنا زي بعضه هنشوفك غزال وهنضحك على نفسنا وعليك يعني.
الراجل مايعيبوش غير جيبه
المجاملة دي تخطت كل الحدود بقى، وللأسف بتتقال حتى لو الشخص فيه كل العبر، وتيجي تعترض على العبر دي يقولوا لا بس الراجل مايعيبوش غير جيبه، طب وكل العيوب التانية دي نتعمي عنها طيب؟
غالبًا الجملة دي بتتقال في عملية إقناع البنت بعريس، ولو قاتل أربعة قبل كده ولا حرامي ولا غير متزن نفسيًا، برضه طالما جيبه مليان يبقى احنا تمام.
بس برضه مع كل ده مش واخدين بالنا إن الجملة اللي فاكرينها مجاملة دي بتعيب في الراجل بكل العبر ما عدا بس فلوسه، يعني أنت مافيش فيك ميزة بس هنعديك علشان فلوسك.
عقبالك
ناس كتير مابتحبش المجاملة دي، ودي بتتقال في خطوبة أو فرح أو سبوع أو نجاح دراسة أو شغل، وتلاقي اللي قدامك بيقول لك عقبالك. ناس كتير بتتضايق علشان بيقولوا “افرض أنا مش عايز يبقى عقبالي” مش عايز نفس نوع الإنجاز ده.
الموضوع بيكون أسوأ لو النبرة اللي بتتقال بها بتبقى نوع من أنواع المعايرة مثلًا وبيكون مصحوب بالكثير من الزن، فبيوتر الشخص اللي بيتقال له عقبالك، يعني زي ما تتقال كتير لبنت لسه ماتجوزتش، ويقولوا لها شدي حيلك عقبالك، أيوة تشد حيلها في إيه هو العريس في الفرن؟
عقبال ما تخاويه
دي كان لازم تتحط في نقطة لوحدها مش بتندرج تحت البند اللي ذكرناه فوق، علشان اتقالت في موقف لشخصية نعرفها. واحدة اتقال لها وهي خارجة من عملية ولادة قيصرية “عقبال ما تخاويه” طب واللي لسه جايباه جوا ده؟ والجرح اللي لسع مالمش؟ وهي مش طايقة نفسها من الوجع اللي حاسة به يتقالها عقبال ما تخاويه كمان.
زي ما قولنا المجاملات حلوة وكل حاجة بس النوع ده من المجاملات مش عايزين نسمعه تاني، ياريت نفكر قبل ما نقولها، علشان ماتبقاش نيتنا كويسة وبدل ما بنجامل الشخص باللي بنقوله ده نبقى بنضايقه.