مصر للأسف بتعتمد بشكل كبير جدًا في القمح على الاستيراد من دول مختلفة، وفي سنة 2021، كان إجمالي استيراد القمح حوالي 2.4 مليار دولار، وفي سنة 2020 استوردت مصر قمح بحوالي 2.9 مليار، يعني استيرادنا للقمح خلال سنة واحدة قل حوالي 16%. اعتمادنا على استيراد القمح هو أزمة بالفعل ومحتاجة حل، بالذات إن روسيا كانت أعلى دولة بتصدر قمح لمصر خلال الـ11 شهر الأولى في 2021، واستوردنا منها قمح بحوالي 1.2 مليار دولار والكمية كانت 4.2 مليون طن، وبكده تبقى روسيا لوحدها بتصدر لمصر 69.4% من إجمالي واردات القمح اللي محتاجينها. أما أوكرانيا كانت تاني أعلى دولة بتصدر قمح لمصر بقيمة 649.4 مليون دولار، وبكمية بلغت 651.4 ألف طن، وبكده واردات مصر من القمح اللي جايه من أوكرانيا شكلت 10.7% من إجمالي واردات القمح المصري.
أزمة القمح العالمية واحتمالية المجاعة المصرية
إذًا مصر كانت معتمدة بشكل كبير على روسيا وأوكرانيا في استيراد القمح، وأي أزمة كانت هتضرب واحدة من الدولتين دول، كانت كده كده هتسبب أزمة كبيرة جدًا عندنا. وللأسف، الأزمة حصلت فعلًا، والدولتين اللي بيصدروا لمصر أكتر من 79% من احتياجاتها من القمح دخلوا حرب مع بعض ومابقاش في مصدر لأهم محصول غذائي الشعب محتاجه.
والأزمة دي مش معناها زيادة أسعار القمح بس، هو القمح سعره هيزيد علشان هيكون مش موجود، ولو ماحلناش الأزمة دي في أسرع وقت ممكن، القمح، اللي بيمثل جزء كبير جدًا من غذاء المصريين، هيختفي وممكن ندخل في مجاعة.
الدولة بتعمل إيه علشان تحل أزمة القمح في مصر؟
آخِر الدراسات اللي اشتغلت عليها الدولة كانت بهدف تحديد الصعوبات اللي بتواجه الفلاحين في زراعة القمح اللي مصر محتاجاه بكميات كبيرة على دخول الصيف، بالذات بعد أزمة أوكرانيا وروسيا، وده جزء من خطة الدولة علشان تزود الأراضي الزراعية المصرية المزروعة بالقمح بحوالي 1.5 مليون فدان زيادة خلال 3 سنين.
أكد وزير الزراعة واستصلاح الأراضي، السيد القصير، إن الدولة المصرية بتوجه جزء كبير أوي من اهتمامها دلوقتي في زيادة الأراضي الزراعية اللي بتطلع محصول قمح، من خلال استصلاح أراضي جديدة وتشجيع الفلاحين على زراعة القمح، في إطار خطة الدولة لتحقيق الاكتفاء الذاتي من القمح لإنه بيشكل ملف خطير جدًا في الأمن الغذائي المصري. ووضح الوزير إن مساحة الأراضي الزراعية اللي مزروعة بقمح زادت السنة دي بحوالي نص فدان عن السنة اللي فاتت.
فدان القمح الواحد في مصر بيطلع إنتاجية قدرها 3 طن، ومصر بتنتج حاليًا حوالي 10 مليون طن قمح، لكن إحتياجنا للقمح حوالي 18 مليون طن؛ يعني حتى لو نجحت الدولة في خطتها، هنفضل لسه محتاجين لحوالي 4 مليون طن قمح نستوردهم من بره، وده معناه إن الطريق للاكتفاء الذاتي من القمح صعبة ولسه قدامها كام سنة، بس نقدر نحققها.
عقبات زراعة محصول القمح في مصر
المصادر الرسمية المصرية بتأكد إن زراعة القمح في مصر، زيها زيّ باقي المحاصيل الاستراتيجية، هي من أهم العقبات اللي بتواجهها هي الآفات الزراعية، وده على حسب خبرات الفلاحين اللي الدولة تواصلت معاهم.
وعلى حسب كلام مسئولين من وزارة الزراعة وواستصلاح الأراضي، بتشتغل الدولة حاليًا على الخطة دي من خلال زيادة حملات الترشيد الزراعي، علشان يساعدوا الفلاحين يزرعوا محصول قوي ويكون إنتاجه كبير، وكمان بتوفر مبيدات زراعية وحاجات تانية كتير بيحتاجها الفلاحين علشان يزودوا إنتاج القمح، ويطلعوا محصول بجودة كويسة.
وأكدت المصادر إن مشكلة الآفات الزراعية نقدر نلخصها في نقص الأسمدة، وإن الأرض الزراعية في مصر بتزيد فيها نسبة الملوحة وآثار التغييرات المناخية، ودي المشاكل اللي الدولة النهارده شغالة عليها بطرق مختلفة.