قصة لشاب بتشبه القصص اللي بنشوفها في الأفلام، الشاب السعودي تركي السنيد لقى والدته في مصر بعد فراق 32 سنة حصل بعد خلافات عائلية بين والده ووالدته كانت سبب في انفصالهم، لكن اللي حصل بعدها خلّى الشاب يفقد والدته طول السنين دي.
القصة بدأت لما سافرت والدته للقاهرة لزيارة أهلها، لكن حصلت خلافات ووالده انفصل عنها هناك، ورجع المملكة ومعاه الطفل بدون أمه، وبعدها وصلت للأم أخبار إن ابنها توفي وهو عنده 4 سنين، لكن في الوقت ده هو كان عايش مع جدته لوالده، وفضل سنين بيبحث عن والدته بكل الطرق.
وسافر الشاب لمصر علشان يدور على والدته، وتوجه للسفارة السعودية في القاهرة وهناك لقى جميع الأوراق الخاصة بملف والدته، وتم التواصل مع الجهات المعنية المصرية اللي بحثت عن الأم المفقودة لحد ما عثرت عليها.
وقدر الشاب تركي السنيد يلاقي أمه بعد فراق سنين طويلة، ووجه الشكر للسفارة السعودية في القاهرة، وعلى رأسها السفير أسامة نقلي، بالإضافة للجهات المعنية في مصر اللي حققت حلمه بلقاء والدته بعد فراق 32 سنة.