برغم إن رابطة كارهي الصيف مش طايقين نفسهم، بسبب الموجات الحارة اللي دخلت علينا من غير أي تمهيد أو استئذان ومراعاة لشعور الغير، بس بنحاول نزق الكام شهر دول بإننا نتغزل في الصيف ونحاول نطلع منه بأي ميزة من هنا ولا من هنا علشان نقدر نتعايش، ومن ضمن مميزاته اللي مش بتبقى موجودة في الفصول التانية هو وجود مهن وأشخاص مش بنشوفهم غير في الفصل ده وبيوحشونا من السنة للسنة.
بياع التين الشوكي
حبيبنا وحبيب الملايين، بتحس معاه باحتواء وطيبة غير مبررة مش موجودة عند بياعين تانين وهو بيقشرلك التين واحدة واحدة وتاكلها على الواقف، ومعاه بتفضف بهمومك.
ثلاثي الفريكسا وخد الجميل والسميط والدقة
مقرهم الأساسي على الشواطيء خاصًة شواطيء اسكندرية، بيوحشونا برضه من السنة للسنة، وقيمتهم مستمدة كونهم مهن تراثية عاصرت مراحل مختلفة في المنطقة.
بائع العرقسوس والتمر هندي
الشو اللي بيتعمل من قبل ما ينزلك بكوباية العرق سوس والتمر هندي بيجري ريقك على الكوباية من إيد ملوك المشروبات، بتلاقيهم جايين لك نجدة من السما في وسط الحر والزحمة وقبل ما تبدأ تعيط وتنهار.
ملك الشمسيات والكراسي
وده بيبقى ملك فعلا لأنه معاه سلطة مش مع حد تاني ومن مصلحتك أنك تتصاحب عليه، علشان حتى الكراسي والشمسية محتاجة واسطة ولو كانت بفلوس، شمسية يا هانم؟ كرسي يا باشا.
مصوراتي البحر
موضوع صور البحر قل كتير عن زمان، والناس استبدلته بالسيلفي وتصوير الموبايلات، بس لسه في عشاق لصور الكارت وأنهم يمسكوا الورق في إيديهم بعد ما بتمر بمراحل التحميض، تحسها كده صورة متعوب عليها.