بعد الوقفة وصلاة العيد، يبقى السؤال هنعمل ايه في أيام العيد؟ ده بيبقى سؤال منتشر بين ناس عارفة أنها مش هتخرج و هتفضل في البيت وغالبًا مافيش زيارات كمان، ورغم تعدد واختلاف أسباب عدم خروجنا أو سفرنا في الأجازة، يبقى السؤال واحد: ممكن نروح فين في البيت عشان نغير جو؟
البلكونة
البلكونة أو ما يعرف بشرفة المنزل هي الوجهة السياحية المفضلة في المنزل، تقدر تشوف شروق وغروب الشمس منها وتاكل الكحك مع المشروبات الساخنة خصوصًا وقت سماع آذان الفجر، وتستمتع كمان برؤية الشارع وهو فاضي تقريبًا في جو رايق.
غرفة النوم
هي وجهة سياحية مفضلة لأغلب الناس في الأجازات، تفرد ضهرك وتبص للسقف وتتنح من غير تفكير في أي حاجة، أو بتفكير زيادة لو أنت من محبي جلد الذات يعني، وتقدر برضه تستخدم الأوضة في القعدة على الأرض أو على البين باج ولعب أي ألعاب مع اخواتك وأقاربك زي connect 4 والمونوبلي والكوتشينة وUNO، غير نشاط النميمة وحكي قصص الرعب من الأفلام، بالإضافة إلى ممارسة الأنشطة القتالية زي تجربة أحدث حركات المصارعة مع أخواتك.
المرايا
فرصة رائعة للعناية بالبشرة والشعر، ماسكات للوجه، سيشوار وحمام كريم وبلسم للشعر، نجرب تسريحات جديدة، أو نطلع روح الميكاب أرتيست اللي جوانا
الكنبة قدام التليفزيون
أيًا كان مكان التليفزيون عندك، فهو جزء لا يتجزء من رحلتك السياحية في البيت، تشوف أفلام تعرض لأول مرة أو مسرحيات القديمة اللي بتتكرر كل عيد لحد ما بقت تحفظها عن ظهر قلب مثل “مدرسة المشاغبين” و “العيال كبرت” و “سك على بناتك” و”المتزوجون” و”ريا وسكينة”، بالإضافة إلى فيلم “أفريكانو “الأيقوني. ومن تقاليد المكان في هذا اليوم لعب الplay station لساعات .
المطبخ
لا يجب أن يمر عليك العيد إلا ويجب عليك الدخول للمطبخ لتناول الكحك، أو ممارسة نشاط الجلوس أمام الثلاجة بلا هدف، لكن أنصحك عزيزي السائح أن تجرب عمل وصفة طبخ جديدة أثناء زيارتك لهذا المكان، ومن ثم الذهاب للنزهة إلى السفرة.
السطح
وجهة مميزة ومختلفة وغير تقليدية لمن لم يعتاد الطلوع إليه، حيث يمكنك الإستمتاع بالهواء البارد و لعب الكرة بدون توبيخ من والديك، و ممارسة نط أو شد الحبل من أخواتك، أو تناول الوجبات الخفيفة هناك.
اخر كلمة : ما تفوتوش قراءة: رحلة زمنية مع فُسح وخروجات العيد لجيل التمانينات والتسعينات