أول مصري وعربي وأفريقي يحصل على لقب السوبر جراند ماستر في الشطرنج، وهو لقب شرفي بيطلق على اللاعب اللي تصنيفه بيوصل لـ 2700 نقطة، هو الدكتور المصري باسم أمين، اللي حصل عليه في نوفمبر 2017، واللي كمان دخل ضمن الـ 100 الأوائل في اللعبة على مستوى العالم من نوفمبر 2013، باسم ساب الطب واتفرغ للشطرنج، وحصل فيه على ألقاب كتير، وكسب بطل العالم في اللعبة مرتين، وده كله وهو معتمد على نفسه في التدريب.
باسم وصل لأفضل تصنيف ليه على العالم في يونيو 2019 لما كان تصنيفه الـ 33، ودلوقتي هو في المركز الـ 42 على العالم، وكمان اتعرض عليه التجنيس لأمريكا ورفض، وبيلعب لمصر ببلاش من غير مكافآت، وبيرفع اسم البلد في البطولات العالمية في لعبة الشطرنج، وعلشان كده إحنا في سكوب إمباير حبينا نعرف من باسم أمين أكتر عن البطولات الجاية اللي هيشارك فيها، وهل في دعم من الدولة بعد ما حقق نجاحات كتير؟ وإزاي بيواصل التدريب في ظروف كورونا اللي إحنا فيها؟
وقالنا ملك الشطرنج المصري إن البطولات دلوقتي متوقفة بسبب ظروف جائحة كورونا، لكن ده مامنعهوش إنه يكمل تدريب، ويحسن أكتر من قدراته من خلال إنه يتدرب أونلاين، على برامج شطرنج متخصصة على الكمبيوتر، وكمان قالنا إن وزير الرياضة الدكتور أشرف صبحي قابله أكتر من مرة، وكلمه باركله بعد لما كسب بطولات، وقدمله الدعم المعنوي بس.
باسم حصل على 104% في الثانوية العامة، ودخل كلية الطب، وكان بيلعب في بطولة العالم للشباب، اتخرج من الكلية واستقال واتفرغ للشطرنج، وحصل على لقب أستاذ دولي في الشطرنج، من وهو طفل بيشارك في بطولات عالمية وبيقدر يحتل فيها مراكز وياخد ميداليات، من سنة 1998 وهو بيلعب وبيشارك في بطولات تحت سن 10 سنين، وحقق وقتها المركز السابع على العالم، وليه مسيرة طويلة مليانة بطولات ومراكز عالمية.