أفضل 10 لاعبين مصريين في الإسكواش مشرفينا في البطولات العالمية

في الإسكواش مفيش حد زينا، دي حاجة معروفة، فالمصريين من أول الناس اللي لعبوا الإسكواش، وسيطروا على اللعبة على مستوى العالم، وكل سنة بيطلع من مصر أبطال جديدة من الرجال والسيدات بيحققوا إنجازات عالمية، وبيكسبوا ميداليات في كل المسابقات المختلفة في الإسكواش، وبيرفعوا رأس مصر قدام العالم كله وبيخلونا فخورين جدًا بإنجازاتهم.. فتعالوا نتعرف على بعض اللاعيبة دول.

علي فرج

عن: superkora

من مواليد سنة 1992 بالقاهرة، وعلي المصنف الأول على العالم دلوقتي في تصنيف رابطة اللاعبين المحترفين للإسكواش “PSA” بعد ما كسب بطولة كلاسيك من أيام قليلة، وحقق علي بطولات كتير أهمها بطولة السويد المفتوحة، وبطولة أمريكا المفتوحة، وبطولة مصر للإسكواش، وهو زوج اللاعبة المصرية المحترفة نور الطيب.

محمد الشوربجي

اتولد محمد في 12 يناير من سنة 1991 بالأسكندرية، الشوربجي هو بطل العالم للأسكواش في 2017، وهو مصنف دلوقتي في المركز التاني على مستوى العالم، ومثل مصر في بطولات عالمية كتير، وعنده أخ كمان لاعب محترف في رياضة الإسكواش وهو مروان الشوربجي.

طارق مؤمن

اتولد طارق مؤمن في 23 فبراير من سنة 1988 بالقاهرة، وهو مصنف تالت من رابطة اللاعبين المحترفين للإسكواش “PSA”، وكسب بطولة كولومبيا المفتوحة، وبطولة ماكو بالصين، وبطولة ماليزيا المفتوحة، وهو متجوز من لاعبة الإسكواش المحترفة رنيم الوليلي.

كريم عبد الجواد

اتولد كريم في 30 يوليو من سنة 1991 بالأسكندرية، وكسب كريم بطولة العالم المفتوحة للإسكواش في سنة 2016، وهو متصنف في المركز الرابع دلوقتي على العالم، ويعتبر تالت مصري يكسب بطولة العالم.

رامي عاشور

عن: عين

رامي اتولد 30 سبتمبر من سنة 1987، وكسب أول لقب عالمي ليه في سنة 2004، وكان وقتها اتصنف كأصغر لاعب يكسب بطولة العالم للإسكواش، وكان لسه ماكملش 16 سنة، وفي 2006 بقى أول لاعب في التاريخ يأخد لقب بطولة العالم للشباب مرتين، وفي 2007 كسب نهائيات آتكو الحدث السوبر. و”مالكوم ويلستروب” أسطورة الإسكواش قال عنه إنه بيتحرك أحسن من أي لاعب في اللعبة ويتميز بمهارات مميزة ورائعة.

نور الشربيني

اتولدت في 1 نوفمبر سنة 1995، وهي المصنفة الأولى دلوقتي في العالم، وهي أول لاعبة مصرية كسبت لقب بطولة إنجلترا المفتوحة للإسكواش تحت سن الـ 13 في سنة 2009، وكمان أول لاعبة مصرية وأصغر لاعبة في العالم بتتأهل لبطولة بريطانيا المفتوحة في سنة 2012.

نوران جوهر

نوران اتولدت في 30 سبتمبر من سنة 1997، وهي المصنفة التانية دلوقتي على العالم في الإسكواش، ونوران أول مصرية تكسب بطولة الهونج كونج الدولية المفتوحة للإسكواش في 2016، وهي بطلة العالم للناشئات تحت الـ 19 سنة.

نور الطيب

اتولدت نور في 8 مارس من سنة 1993 بالقاهرة، ونور دلوقتي في المركز التالت في تصنيف رابطة اللاعبين المحترفين للإسكواش “PSA”، وحققت المركز التاني في بطولة أمريكا المفتوحة، وبطولة ماليزيا، وبطولة هونج كونج.

رنيم الوليلي

اتولدت رنيم في 1 يناير من سنة 1989 بالأسكندرية، هي لاعبة محترفة، وهي واحدة من أمهر اللاعبات المصريات في رياضة الإسكواش، وكسبت بطولة العالم للناشئين في سنة 2005، و2007، وفي سنة 2015 كسبت بطولة الصين المفتوحة.

هانيا الحمامي

المصنفة الخامسة على العالم دلوقتي، وكسبت بطولة CIB الدولية للإسكواش السنادي، ومتوقع ليها إنها تنافس بقوة على البطولات الكبيرة على مستوى العالم.

آخر كلمة: ماتفوتوش قراءة: بنات مصر في الرياضة.. 8 لاعبات حققوا إنجازات في الألعاب المختلفة.

تعليقات
Loading...