في قاموسنا المصري في كلام كتير ماحدش يعرفه ولا يفهمه غير المصري الأصيل اللي لف في شوارعها وقعد على قهاويها وعارف مين بيودي على فين، وفي نفس الوقت هنلاقي في قاموسنا كلام بنقوله كتير ومش عارفين أصله منين، ولما تحب تعمل فيها عميق وتدور ورا أصل الكلام، هتتفاجيء، وده اللي هنعمله معاكوا النهارده. جبنالك أصل وفصل الكلمات العامية المصرية.
يا خراشي
هي يمكن كلمة قديمة شوية، بس لسه الناس بتستخدمها، بس مش مفهوم الحقيقة احنا لما بنستخدمها بنبقى فرحانين ولا زعلانين. المهم، خراشي ده أصلًا كان اسم أول شيخ أزهر “محمد الخرشي”، وكان معروف عنه إنه راجل عادل وبينصر الناس وبيجيب حق المظلومين والضعفاء، فكانوا بيستخدموا الكلمة أو اللقب بتاعه زيّ نداء شعبي كده لما يحتاجوه، وطبعًا زيّ أي حاجة مصرية، تم تحريف الكلمة وبقت “يا خراشي”.
يا دلعادي
كلمة كانوا بيستخدموها زمان في الأماكن الشعبية ضمن وصلات الردح، أصلها “يا ألد أعدائي”، يعني أشد أعدائي.. يعني تخيل كده الكلمة اللي بتقولها الستات في الشارع معناها “نعم يا ألد أعدائي؟”
شوباش
كلمة أول ما بتسمعها بتحس إن الناس ملمومة أو لازم تتلم، في فرح أو حزن بقى مش مهم، وأصل الكلمة بيرجع للغة الهيروغليفية القديمة. وفي روايتين لأصلها جاي منين؛ في رواية بتقول إن الكلمة أصلًا بتتقسم لجزئين “شو” معنى “مئة” وباش بمعنى “فرحة وسعادة” ولو حطيناهم مع بعض “مية فرحة وسعادة”، ودي كانوا بيقولوها في الأفراح زمان “شوباش لأهل العريس ولأهل العروسة”. وفي رواية تانية بتقول إن أصلها جاي من تماثيل “الشوباشي”، ودي كانت تماثيل صغيرة بتتحط في قبر الميت علشان يرددوا الدعاء له، ولإن الكلمة في الأصل كانت بتتقال بنبرة حزن، فدخلت في قاموس الحارة المصرية ضمن وصلات الردح.
توتة توتة .. خلصت الحدوتة
توتة توتة خلصت الحدوتة حلوة ولا ملتوتة، دي واحدة من أكتر العبارات القريبة من قلبنا وكنا بنسمعها واحنا صغيرين لما بيتحكلنا الحدوتة. بس لو جينا دورنا ورا الجملة، هنلاقي إن في كتاب “اللهجة العامية وجذورها المصرية” للكاتب سامح، كلمة “توتة” موجودة في اللغة القبطية بمعنى نهاية أو حافة، ودي في الأصل متاخدة من الكلمة المصرية القديمة بمعنى “صنع أو اكتمل” .. وملتوتة نفس المعنى بس أتحط لها “مل”، بمعنى إن الطفل عايزك تكمل وتحكي له حدوتة تانية.
المرمطة
عاجباك المرمطة اللي أتمرمطها دي يا راضي؟ في مراجع تاريخية بتقول إنها أصلها جاي من كلمة فرعونية “مارماتا”، واللي معاناها الألم والوجع والمعاناة، وبالتدريج دخلت في قاموسنا العامي وبقت تتقال على أي حد مسحول وطالع عينه في الحياة.