على مدار تاريخ مصر بحضارة عمرها 7 آلاف سنة، في ملوك كتير حكموا مصر وكتبوا تاريخها وكان لهم إنجازات على كل المستويات، وبجانب الملوك كان في ملكات اتميزوا بالشجاعة والتخطيط والجرأة والذكاء، وبمهارات قيادية وعسكرية أهلتهم يبقوا ملكات ومصدر ملهم يتكتب في التاريخ.
حتشبسوت
واحدة من أهم وأشهر ملكات مصر وأكثرهم إثارة على مدار التاريخ. نجحت إنها تحكم مصر نيابة عن ابن جوزها تحتمس التالت على مدار أكتر من 20 سنة. وحققت وقتها كتير من الإنجازات. ولقوا المومياء بتاعتها سنة 1903 في مقبرة KV 60 بوادي الملوك في الأقصر. هي اللي كسرت القواعد والتقاليد اللي كانت موجودة في مصر من إن الست تبقى ملكة. بس طلعت وقتها وعينت نفسها ملكة لمصر باعتبارها من دم ملكي “ابنة ملك وزوجة ملك” ولحد دلوقتي يتعتبر نهاية حتشبسوت من النهايات المجهولة.
كليوباترا
آخر ملوك الأسرة المقدونية وحكمت مصر بعد وفاة الإسكندر الأكبر، وصفوها بإنها كانت جميلة. وكان في جدليات كتير على ازاي ماتت وفي مصادر بتقول إنها انتحرت خوفًا من إنها تتاخد أسيرة بعد خسارتها في حرب من الحروب. ومصادر تانية بتقول إنها ماتت من لدغة تعبان.
أحمس نفرتاري
بتعتبر أول ست في التاريخ تتقلد منصب قيادة فرقة عسكرية كاملة وقاتلت بشجاعة ومهارة عالية. وأول ملكة تحصل على مركز الزوجة الآلهة لأمون، ملكة وقائدة عسكرية شاركت في طرد الغزاة من مصر.
الملكة تي
من أعظم ملكات مصر الفرعونية وساندت زوجها وابنها فى أمور المملكة اقتصاديًا وسياسيًا. وكانت نائبة عن الملك فى الاحتفالات، لدرجة إنه كان بيكتب اسمها فى المراسلات الدولية. وكان لها الدور فى تنصيب ابنها إخناتون على عرش مصر. ووقت موكب نقل المومياوات طلعت كوميكس عن ازاي لسه هي محتفظة بشعرها وبجماله طول السنين دي؟ وكوميكس عن إيه الروتين اللي كانت بتستخدمه لشعرها.
نفرتيتي
واحدة من أقوى النساء في مصر القديمة. اسمها معناه “المرأة الجميلة التي أقبلت”. ساندت جوزها وقت ثورته الدينية والاجتماعية ولعبت دور في نشر المفاهيم الجديدة اللي كان بينادي بها جوزها أخناتون.
شجرة الدر
الملكة الوحيدة اللي قدرت إنها تتولى عرش مصر بعد الفتح الإسلامي. وفي تاريخها في أمور كتيرة كانت مجهولة زيّ الطريقة اللي ماتت بها.
أخر كلمة: ماتفوتوش قراءة: “عظمة مصر”: تمثال بيحكي قصة من صفحات تاريخ مصر القديمة