قائمة بنجوم مصريين وصلوا لهوليوود بشكل أو بآخر

مصر ديمًا اسم ساطع وله شنة ورنة في أوساط مختلفة كتيرة من أهمهم الوسط الفني. عدد الفنانين في مختلف أشكال الفن من غناء وتمثيل ومسرح لا حصر له. لكن في أسامي رفعت راس المصريين بوصولها لهوليوود يعني للعالمية من خلال أعمالهم المميزة. أعمال خلت المكان الأول في العالم للفنانين للإشادة بيهم وتكريمهم. جمعنا أشهرهم في قائمة علشان نفتكرهم هما وإنجازاتهم. 

عمر الشريف 

غني عن التعريف، اسم خالد في تاريخ السينما المصرية والعالمية حتى بعد رحيله عن العالم. من أشهر ممثلين مصر اللي ساهموا في تشكيل السينما المصرية وساعدوا في وضع مصر على الخريطة العالمية سينمائيًا. فاز بثلاث جوايز جولدن جلوبز عن أدوار عظيمة له زيّ لورنس العرب ودكتور جيفاغو وكمان اترشح لجايزة الأوسكار لأفضل ممثل مساعد عن دوره في لورنس العرب. 

رامي مالك 

ممثل ومنتج أمريكي من أصل مصري. بيلعب أدوار مهمة وفارقة مع كل متابعي السينما. ومع كل نجاحاته المتتابعة إلا إنه مازال مستمر والكل شايف إنه مستقبله مشرق وأحسن من الأول. اترشح لجولدن جلوب وفاز بإيمي، والأهم إنه فاز بالأوسكار عن دوره في فيلم السيرة الذاتية الملحمة البوهيمية. 

أحمد وليد

شاب مصري متخصص في المؤثرات البصرية، شارك في أعمال كتير زيّ أفينجرز والجميلة والوحش وغيرهم كتير. حصل على جايزة الأوسكار لدوره في المؤثرات البصرية في فيلم سبايدر مان.

 أحمد حافظ 

مونتير، اشتغل على أعمال زيّ (كلاش) و (أميرة). ودلوقتي بيشتغل على أكبر أعماله من حيث الانتاج والعالمية مسلسل (موون نايت) من إنتاج مارفل وهيتعرض على ديزني+. وعبر عن امتنانه على السوشيال ميديا إنه تم اختياره لعمل عالمي زيّ ده. ومين عارف ممكن نلاقي اسمه في ترشيحات جوايز جاية.

يسرا

عن cnn

أيقونة من أيقونات السينما المصرية. موهبتها بتتكلم عن نفسها وتنوع أدوارها والمخرجين والفنانين اللي بتتعاون معاهم في أعمالها زيّ يوسف شاهين وغيره وصلتها للمكانة المرموقة اللي وصلت لها دلوقتي. وكمان ضمنت لها مكان كعضو في لجنة أكاديمية الأوسكار. يعني رأيها معتبر وذو مكانة كافية إن الأكادمية تاخد بيه في التصويت للأفلام المترشحة للأوسكار. 

 عمرو سلامة

كلنا بنتفرج على “بيمبو” دلوقتي ومستمتعين بيه. نقدر نشكر عمرو سلامة لإنه المسئول عن ده. وكمخرج مصري فهو مسئول برضه عن كمية أعمال ناجحة من أفلام جريئة بتحكي الواقع المصري لمسلسل ما وراء الطبيعة على نتفلكس اللي بيفكرنا بنوستالجيا وذكريات ما مضى. و زيّ يسرا هو كمان عضو في لجنة أكاديمية الأوسكار وهو وصوته مسئولين عن اختيار الأفلام والممثلين اللي تاخد الأوسكار. 

محمد حفظي 

منتج وكاتب سيناريو مصري من القاهرة. أعماله الأكثر شهرة أميرة والشيخ جاكسون وغيرهم كتير. أفلامه مميزة جدًا وله بصمة في السينما المصرية الحديثة لدرجة إنه العربي الوحيد في قائمة 30 قائد مستقبلي لإنتاج الأفلام. زيّ يسرا وعمرو سلامة، محمد حفظي عضو في لجنة أكاديمية الأوسكار. 

نسينا فنان مصري وصل للعالمية من القائمة؟ يا ترى مين تاني وصل لهوليوود، وأي أسماء منهم أو أسماء جديدة ممكن توصل للأوسكار؟

آخر كلمة: ماتفوتتوش قراءة: مين هو أحمد حافظ، المونتير المصري اللي هيشارك في مسلسل Moon Knight

تعليقات
Loading...