في اليوم الأول من سنة 2023، بدأ عرض المسلسل الأمريكي Kaleidoscope، اللي بيقدم قصة عملية سرقة ضخمة بمبلغ سبعة مليار دولار، بيتهدد نجاح العملية الملحمية بسبب الطمع والخيانة وبيتعرض طاقم العملية لخطر كبير.
اللي جذبنا في المسلسل هو مشاركة الممثلة المصرية روزالين البيه بدور بطولة، من خلال شخصية واحدة من طاقم السرقة، هي جودي جود وين.
اشتغلت روزالين البيه في السينما والتلفزيون المصري بالإضافة لظهورها في الفيديو كليب، تم اختيارها من نقاد الوفد كأحسن ممثل مساعد، وأفضل وجه جديد، عن دورها في مسلسل قبيل 2019، واشتغلت في السينما الأمريكية من خلال مسلسل رامي، وأثبتت نفسها كممثلة موهوبة وقادرة على لعب أدوار مختلفة ومميزة.
أما من خلال مسلسل Kaleidoscope، بنشوفها بشكل مختلف جنب أسماء كبيرة في صناعة السينما الأمريكية زيّ؛ بيتر مارك كيندل وجيانكارلو ايسبوزيتو وروفوس سيويل.. وغيرهم.
بتقول روزالين إنها محظوظة إن جت لها الفرصة تشتغل مع رجال وستات كُبار في صناعة السينما، من خلال أعمال مختلفة، وهي الأسماء اللي حبتها من الطفولة، بسبب حبها الكبير للسينما، بتقول البيه: “المرة الأولى اللي قابلت فيها جيانكارلو كانت خلال قراءة نص Kaleidoscope، وفقدت الوعي في أول مشهد لنا مع بعض”.
قضت البيه وقت جميل خلال تصوير المسلسل، وكانت قريبة من طاقم العمل، اللي ملوا أجواء التصوير بالمرح طول الشهور العشرة اللي قضوها في الشغل على المسلسل.
كان اليوم الأخير في التصوير هو المفضل عند روزالين، فبتقول: “حولنا اليوم لسرقة كبيرة حقيقية، جيانكارلو سرق فيل خشب من مكتب ليو (شخصية جيانكارلو في المسلسل) واداهولي، وإريك جارسيا (مبدع العمل) سرق كتاب الكيمياء بتاع والد جودي (شخصية روزالين البيه في المسلسل)، كانت سرقة تانية غير اللي في المسلسل بس الفرق إننا كنا بنضحك، واستأذنا علشان احنا مش قد سرقة حقيقية”.
بين روزالين البيه وجودي جودوين: التحضير للشخصية
قدرت روزالين تفهم شخصية جودي من خلال مستويين مختلفين، الأول إنها شخصية ذكية ومجتهدة وبتحب المذاكرة، وبتقول البيه: “احنا الاتنين عندنا نفس الصفات دي”، وبتوضح البيه إن جودي بتحتضن الجزء ده من شخصيتها، وهو اللي خلى البيه تستمتع جدًا بلعب دورها، بالذات إن الذكاء والاجتهاد ده خلى الشخصية مرغوبة من بوب وستان.
بتقول البيه عن تحضيرها للدور: “عملت أبحاث كتير علشان أفهم خلفية شخصية جودي كمختصة كيميائية، واشتغلت على تفاصيل كتير بخصوص شغلها مع طاقم التحضير والكُتاب، واتدربت على شغل الكيمياء بتاعها كمان”.
أما المستوى التاني اللي قدرت البيه تفهم من خلاله شخصية جودي، فهو حقيقة إن الشخصية متجوزة شخص (مؤذي عاطفيًا)، شخص بتحاول تصلح عيوبه باستماتة، وبتحاول تعلمه ازاي يحبها بشكل أفضل، عايشة في دايرة مفرغة ومسجونة فيها، ومش قادرة حتى تعترف لنفسها بالواقع ده، بتقول البيه: “للأسف هو ده الواقع بالنسبة لناس كتير عايشة في علاقات مؤذية زي دي”.
اشتغلت روزالين مع جاي كورتني وبيتر مارك كيندال على تشكيل الديناميكا اللي بين ستان وبوب وجودي، وقدروا يطوروها بشكل كبير مع إيريك جارسيا، بتقول البيه: “الديناميكا دي كان مهم جدًا نفهمها ونطورها بشكل كويس علشان مش بنعيش تفاصيلها بشكل كبير على الشاشة، وفي نفس الوقت لها تأثير كبير جدًا على عملية السرقة ككل، كنا عايزين نصيغ كل التفاعلات اللي بتحصل في العلاقة دي بشكل كويس جدًا، بما فيها التفاصيل الدقيقة اللي المشاهد مش بيشوفها على الشاشة”.
كان مهم جدًا بالنسبالي إني أعيش تفاصيل العلاقة دي بالكامل، بما فيها من فوضى واضطراب، ومن غير الرضا الناتج عن الحصول على نهاية واضحة ونهائية، وأتقبل فكرة إن القصة بتنتهي بجودي في نقطة من حياتها محتاجة فيها تُشفى من اللغط اللي حصل وتحسب النتيجة النهائية اللي وصلت لها، بكل ما نتج عن علاقتها مع بوب واللي أجبرتها تعمل حاجات معينة، وتواجه الشخصية اللي سمحت لنفسها تتحول لها وتستوعبها.
استغلاله وإيذاؤه العاطفي والخطر اللي بيشكله وقد إيه هو متلاعب، مش بتظهر كحقيقة لا جدال فيها لحد حلقة عملية السرقة، لإنه أخيرًا بيتعدى عليها جسديًا وبيحاول يقتل كل الشخصيات اللي حواليه، وهي النتيجة اللي أي حد شاف علاقتهم مع بعض هيتوقعها بالفعل (وستان نفسه كان متوقع ده لحد كبير). بتقول البيه:”للأسف ده الواقع لناس كتير، جزء من الواقع المؤسف ده بيرجع للمجتمع اللي مش بيدرك إن في علاقة استغلالية ومؤذية غير لما الموضوع يتحول لاعتداء جسدي وتظهر الضحية بعلامات الاعتداء ده، وللأسف أحيانًا مش بندرك المشكلة حتى لما الضحية توصل للمرحلة دي”.
مسلسل يتشاف بأي تتابع ممكن: ازاي اتصور؟
المسلسل اللي بيسمح للمشاهد إنه يتفرج عليه بأي تتابع هو عايزه من غير ما يؤثر على قصة العرض، بيقدم تجربة مميزة وجديدة بالنسبة للمشاهد، ورغم إن التصوير ماختلفش كتير عن أي مسلسل تاني، تجربة روزالين البيه في التصوير كانت مختلفة.
بتقول البيه: “غالبًا الممثل بيقدر يربط علاقة الشخصية مع المشاهد من خلال تتابع معين في القصة، يعني مثلًا، في مشهد معين بيقول الممثل إن المشاهد هيشوف الشخصية هنا للمرة الأولى وبالتالي هيكون انطباعه الأول بناءً على المشهد ده”، وبتضيف: “بعد حلقتين المشاهد هيدرك كذا وكذا… كل الحاجات دي بتساهم في تكوين عناصر الأداء التمثيلي”.
بتوضح البيه تجربتها المختلفة في تصوير المسلسل: “هنا ماعندناش القدرة إننا نمشي على التتابع ده أو نتحكم في الانطباعات دي عند المشاهد، وده حسسني إني حرة أكتر، كنت في كل مرة بلعب شخصية جودي على حسب هي حاسة بإيه في اللحظة دي، من غير ما أحدد فين اللحظة اللي المشاهد هيشوفها فيها للمرة الأولى”.
روزالين البيه: ممثلة موهوبة وكاتبة سيناريو وفنانة مسرح
رغم صعودها السريع للعالمية من خلال أعمال أمريكية مهمة وواسعة الانتشار، هتفضل السينما والدراما المصرية جزء مهم جدًا بالنسبة لروزالين اللي بتقول إنها دايمًا هتستثمر في السينما المصرية، بتقول البيه: “ماظنش إن الشغل في السينما الأمريكية بيتناقض مع الشغل في السينما المصرية”.
بعد نجاحات كبيرة كممثلة في السينما والدراما سواء مصرية أو أمريكية وإثبات نفسها في صناعة سريعة الوتيرة، سألنا روزالين عن اللي بتحاول تحققه بعد كده، وقالت: “يسعدني أكون جزء من صناعة بتتغير طول الوقت وبتتحسن، سواء كنت بمثل قدام الكاميرا أو بشتغل في الكواليس”.
وبتضيف: “واحدة من الحاجات اللي نفسي تتحقق في شغلنا هي معاملة الناس اللي بتشتغل في السينما بشكل كويس وياخدوا حقهم، ده هيخلي الشغل أفضل وهيساعد في إضافة عناصر أكتر للقصص اللي نقدر نحكيها”.
روزالين البيه مش بس ممثلة، ولكن كاتبة سيناريو وفنانة مسرح، سألناها إيه الفن الأقرب لقلبها وقالت: “المسرح هو المكان اللي هيفضل أكتر الفنون القريبة من قلبي، ورجعت فعلًا اشتغل في المسرح السنة دي وحسيت إني رجعت البيت بعد غربة”.
قدمت روزالين البيه أعمال مهمة في المسرح والتلفزيون والسينما، وقدرت تنتقل من كونها ممثلة مصرية حاصلة على جايزة أفضل وجه جديد وأحسن ممثل مساعد للمشاركة في بطولات عالمية، وقدرت تتحرر من حيز المحلية وتصبح ممثلة مصرية من طراز عالمي. كل إنجازات روزالين المميزة دي اتحققت في وقت قياسي، وما زلنا منتظرين نشوف هتقدم إيه في المستقبل، وبعد وقت طويل في مسيرتها المهنية اللي متأكدين إنها هتكون عظيمة.