بواسطة منة حسني.
الزومبا هيّ واحدة من أهم الرقصات المشهورة في عالم الرياضة واللياقة البدنية، تعالوا نتعرف على ظهورها وانتشارها السريع في الشرق الأوسط.
الرقصة دي نوع من أهم أنواع تمارين اللياقة البدنية اللي بيقوم فيها الممارسين على تحريك جسمهم بإيقاع معين سريع أو بطئ على الموسيقي؛ الرقصة معتمدة على المزيكا بشكل وتام وفيها مزيج من حركات الرقص اللاتينية زيّ السامبا والسالسا والميرينغو والكومبيا والفلامنكو وأنواع مختلفة تانية من مختلف أنواع الرقص العالمية زيّ الرقص الشرقي و الهندي.
والزومبا دلوقتي بقت من أكتر برامج اللياقة البدنية المنتشرة حوالين العالم وليها ممارسين ومحبين كتير في أكتر من 125 دولة مختلفة.
طب هي جات منين؟
في أواخر القرن العشرين في مدينة كالي الكولومبية مدرب الرقص اللاتيني ألبرتو بيريز عن طريق الصدفه اضطر يبدل حصة الرقص اللاتيني والموسيقي اللاتينية بموسيقي مختلفة ورقصة مرتجلة ونالت إعجاب متدربينه، ومن هنا أطلق عليها إسم رقصة الزومبا ولاقت الطريقة المرتجلة اعجاب ناش كتير، وبقت بتُمارس علي نطاق واسع في جميع أنحاء كولومبيا.
ومن هنا أسس ألبيرتو شركة كبيرة مقرها في أمريكا بترعى رياضة الزومبا وكانت الشركة دي هيّ إنطلاقة رقصة الزومبا للعالم و بقى بيترمز ليها بـ ZIN.
الزومبا في الشرق الأوسط
ومن هنا بدأ انتشارها للشرق الأوسط عن طريق شركات تانية روجت للرقصة في المنطقة، ومن أول الشركات اللي عملت كده في الشرق الأوسط GLAM Getaway.
جلام هي شركة مروجة للسياحة في مصر والشركة الأولى المروجة للزومبا في الشرق الأوسط من عام 2016، وأول تعاقد كان بين القاهرة والأقصر وأسوان وتم تجهيز مهرجان للزومبا في مصر حيث انتعش التاريخ بأنغام الموسيقي اللاتينية.
و من هنا بقى في كتير من مدربين الزومبا في الشرق الأوسط المعتمدين من ZIN.
سالي سلامة – مصر
ومن ضمن أهم رواد الزومبا في مصر المدربة سالي سلامة اللي حصلت علي شهادة الاعتماد في سنه 2012، وهي من أوائل المنسقين المصريين للأحداث الخاصة بالزومبا في مصر و أهمها تصوير للشركة الأم في أمريكا وتنظيم الحدث الخاص بالقاهرة والأقصر وأسوان في 2016.
ماريانا شنودي – الأردن
من أوائل المدربين الأردنيين الحاصلين على شهادة الاعتماد من شركه زومبا عام 2011، وهي بتعتبر كل حصة من حصص الزومبا احتفال من نوع خاص. ماريانا متخصصة في الـ Toning Zumba وزومبا الاطفال.
هبة خيرالله – لبنان
من أشهر المدربين المعتمدين من عام 2015 وهي دايمًا بتضمن لمتدربيها السعادة المتفجرة وروح الحماس أثناء الرقص.
بثينة سالم – البحرين
بثينة حاصلة على الاعتماد من سنة 2012 وبتهتم بتعليم حصص الزومبا للأطفال ونوع تاني اتسمى بزومبا الخطوات.
رنا العماني – الكويت
المدربة الكويتية رنا العماني حاصلة على الاعتماد من 2008 وبتدَرِس نوع من أمتع أنواع الزومبا وهو الاكوا زومبا أو الزومبا المائية وهي عبارة عن رقصة زومبا معدلة في حمام سباحة.
