بواسطة منة حسني.
كلنا عندنا عادات غير صحية ومش لذيذة ونفسنا نغيرها بس مش عارفين نبتدي منين وإزاي.. كتير من العادات دي مشترك بين شريحة كبيرة مننا زيّ إدمان الحلويات والأملاح أو التدخين، وأوقات كتير بنحس إننا عاوزين نغير حياتنا ونظامها للأحسن، بس مش بنعرف ناخد أول خطوة.. في المقالة دي هنتعرف على دراسة جديدة إسمها دراسة الواحد وعشرين يوم ساهمت في إن كتير حوالين العالم ياخدوا الخطوة الأولى.
الدراسة دي بتوضح إن النهايات العصبية اللي في اللسان -اللي بتنقل الاشارات الحسية للمخ وبتترجم في مركز التذوق لطعم الأكل- بتتعود وتتكيف على أي وضع وأي عادة بعد 21 يوم.
بمعنى آخر، إنك لو من الناس مدمنة السكر في المشروبات وبتستخدم بما يعادل 3 معالق في الكوب الواحد و لسانك لا يمكن يتذوق المشروب ده إلا بكمية السكر دي فأنت لازم تجرب تمنع السكر لمده 21 يوم في نفس المشروب من غير اسخدام بديل عشان تقدر تستطعم المشروب من غير سكر، وعشان كدا بيعتبروا النظرية دي نوع من أنواع علاج العادات الغير صحية.
والدراسات أثبتت إن بعد 21 يوم من منع السكر والملح واستبدالهم بالفواكة والخضروات الطبيعية عند مدمني السكريات أو الموالح، جربوا إنهم يضيفلهم نفس الكمية الأولانيه اللي كانوا بياخدوها في كوب من العصير مثلًا – ثلاث معالق – ووقتها حسوا بأحساس غريب على لسانهم غير اللي كانوا متعودين عليه..
وده نتيجة إن في خلال الـ 21 يوم العقل حصله إنسحاب من اعتماده على كمية السكر والملح والنيكوتين المعتادة واعتياده على كميات مختلفة وبالتالي التكيف ده بينعكس على النهايات العصبية الخاصة باللسان. أنا مش بس بحكي عن نظرية وبحث.. انا كمان بتكلم عن تجربتي الشخصية.
