مؤخرًا بقينا نشوف أعمال بتناقش قضايا المرأة المهدور حقها زيّ فاتن أمل حربي، بس إنك تشوف ده بيترجم قدام عينيك لأعمال وحاجات بتتغير على أرض الواقع بتساند المرأة المعنفة، بيعتبر شيء إيجابي وخطوة بتقول إن الناس دي صوتها بدأ يتسمع. والنهارده سمعنا خبر حبينا تشاركوه معانا كانت أعلنته وزارة الصحة والسكان، وقالت إنه تم افتتاح أول عيادات “المرأة الآمنة” في مركز طبي في محافظة القاهرة.
عيادات “المرأة الآمنة” ده هيقدم إيه؟
- هيقدم خدمات طبية وإرشاد ودعم نفسي للستات اللي هتتعرض لعنف.
- هيبقى فيه خدمات الدعم الصحي.
- هيتم تقديم إسعافات أولية للسيدات اللي بيتعرضوا لمختلف أشكال العنف.
- هيتم تقديم توعية ومشورة صحية واجتماعية.
- هيعرفوا ازاي يدافعوا عن نفسهم في حالة تعرضهم لأي عنف خارجي.
وفي الوقت الحالي بيتم تدريب الفريق المسئول عن تقديم كل الخدمات في مركز المرأة الآمنة، العيادات دي هتبقى بمثابة مساحة آمنة للسيدات هتستفاد فيها من خدمات كتير هتتقدم لها، ده غير إن هيبقى في محافظة على خصوصية وسرية بيانات الستات اللي هيترددوا على العيادات، وهيبقى في ربط بين مؤسسات الدولة المختلفة الداعمة لمناهضة العنف ضد المرأة، وده في حد ذاته شيء إيجابي؛ إنك تفعل دور القطاع الطبي لحماية المرأة، وتحاول تقلل من العنف اللي بتتعرض له سواء بتوعيتها أو إنك تقولها ازاي تدافع عن نفسها علشان مايتكررش معاها تاني.
وبناءً على دراسة حديثة أصدرها الجهاز المركزي للتعبئة العامة والإحصاء، بيقول إن العنف النفسي هو أعلى أنواع العنف اللي بتعاني منه المرأة في سن 18-64 سنة بنسبة 22.3% ومن بعده العنف الجسدي بنسبة 11.8% ومن بعده العنف الجنسي.
وأعلى فئة بيرتفع فيها العنف النفسي والجسدي والجنسي بتبقى الستات اللي بيتعرضوا لعنف من ناحية الزوج في الفئة العمرية من 20-24 سنة.
آخر كلمة: ماتفوتش قراءة: اتكلمنا مع د.سهام حسن عن تأثير برامج المقالب على الأطفال وعلاقتها بواقعة أكياس المياه