“Dogs Fresh Food” مشروع جديد بيوفر أكل طازج لكلاب وقطط الشارع

كلنا بيجي علينا وقت بنواجه فيه صعوبات وتحديات مصيرية، سواء كانت من الناحية المادية أو النفسية وغيره، واللي بيفرق من شخص لشخص تاني هو “إزاي” الإنسان بيقرر يواجه المشكلة اللي بتواجهه.

محمد ناجي مؤسس مشروع “Dogs fresh food“، زي أي شاب في بداية حياته جات عليه فترة كانت صعبة جدًا من الناحية المادية لدرجة أنه ماكنش معاه اللي يكفي أكل كلابه (فلة وليندو)، وده خلاه يفكر بجدية إنه يعرضهم للتبني علشان كان خايف إنه ميقدرش على مصاريف أكل الكلاب اللي بيبقى غالي جدًا، ومر ناجي بحالة نفسية وحشة من عدم الاستقرار المادي والخوف أنه يتخلى عن كلابه اللي عندهم أكتر من 8 سنين، ومش سهل إنهم يتأقلموا مع حد جديد في السن ده.

عن: Facebook

الأزمة دي خلت ناجي يلجأ لمحاولة العثور علي بديل “للدراي فوود” بتاع الكلاب، وجرب إنه يشتري خضار وفراخ وأرز ليهم، والموضوع مكلفهوش أكتر من ثلاثين جنية. وقال ناجي خلال مقابلة مع موقع قعدة ترند: “روحت البيت خليت العضم وبدأت أقطع البطاطا ومش عارف هل هنجح ولا لا، ولو منجحتش مش هياكلو لإن مفيش فلوس وقطعت الفرخة قطع وعملت حلة أرز وبطاطا وقطع الفراخ، وبعدها حطيت الأكل ليهم. يومها فلة وليندو شبعوا جدًا ونامو تقريبا اليوم كله”.

ومن هنا بدأت رحلة ناجي مع مشروع “Fresh food for dogs” في 2019. فبدأ إنه يقرأ عن طرق التغذية الصحية للكلاب والقطط ويبدأ يعملهم وجبات بيطبخها لكلاب الشارع، والوجبات دي بتبقي غنية بالبروتين لأن فيها لحمة أو فراخ أو سمك. وأي حد بيشتري من مشروعه 10 وجبات بياخد واجبتين مجانًا على أمل إنه ينشر ثقافة إطعام الحيوانات اللي محتاجة.

آخر كلمة: متفوتوش قراءة مصر خالية من السُعار: حلم منسي بيساهم في إعادة إحيائه مجموعة من أهالي شيراتون

تعليقات
Loading...
Tweet
Share
Share
Pin