بيظهر مرض الذئبة على شكل طفح جلدي أحمر، ممكن تكون خفيفة أو شديدة، وممكن تكون مؤقتة أو موجودة دايمًا، وفي أغلب الأحيان بتيجي للمرضى على شكل نوبات.
غير الطفح الجلدي، ممكن تسبب النوبات ألم وتصلب وتورم في المفاصل، وألم في الصدر، وقروح في الفم والأنف، وحساسية من الضوء، وممكن تتحول أصابع الإيدين والقدمين إلى اللون الأبيض أو الأزرق لما بيتعرض المريض للبرد أو للضغط النفسي لفترة طويلة.
وبتعرف الأوساط الطبية الذئبة بإنها مرض مناعي، بيسببه نشاط زايد في الجهاز المناعي للمريض بيوصل إن خلايا المناعة بتهاجم أنسجة الجسم نفسها، زيّ الجلد والمفاصل والأعضاء، ولإنه مرض مناعي فهو مش معدي، ولكنه مزمن، وبيعيش مع المريض طول حياته.
تنقسم الذئبة لأنواع، منها الخفيف والشديد، ومنها اللي ممكن تظهر بسبب بعض الأدوية، والأخيرة دي بتختفي بعد حوالي ست شهور من وقف الدواء.
ممكن تتسبب الذئبة في مضاعفات خطيرة لو ماتعالجتش أعراضها، زيّ الفشل الكلوي، والسكتات الدماغية، وفقر الدم، ونزيف داخل الرئتين والتهاب رئوي، والتهاب عضلة القلب، وممكن كمان تسبب الإجهاض للحوامل، وتزود الإصابة بأمراض زيّ هشاشة العظام والسرطان.
للأسف مافيش علاج شافي من المرض، ولكن ممكن نستخدم أدوية علشان تتحكم في الأعراض وتقلل الألم، زيّ المسكنات والأدوية اللي بتقلل المناعة، ومضادات الالتهابات غير الستيرودية، والكورتيزون.
ازاي نقدر نساعد شخص عنده مرض الذئبة؟
لو الشخص عنده استعداد وراثي للمرض، مش هيقدر يتفاداه، ولكن يقدر يداوم على الأدوية اللي تساعده يتحكم في الأعراض، ومن أهم الحاجات اللي نقدر نساعد المريض بها إننا نشجعه على متابعة الطبيب والحرص على الأدوية بتاعته.
وزيها زيّ أي مرض مزمن، بتسبب الذئبة ضغط نفسي كبير على المريض اللي بيمر بآلام وأعراض قاسية بشكل شبه دائم، وبالتالي بيكون محتاج دعم وحب من المحيطين به بشكل كبير.
وغير الأدوية والمتابعة الطبية، ممكن نساعد المريض يتجنب الحاجات اللي بتحفز أعراض المرض؛ زيّ أشعة الشمس والتوتر والتدخين وقلة النوم والتوتر والضغط النفسي.
وعلى عكس المشاع إن النشاط الرياضي ممكن يسبب تحفيز نوبات مرض الذئبة، فالحقيقة إن النشاط الخفيف إلى المعتدل بيساعد على تخفيف تصلب المفاصل وآلام العضلات اللي بيسببها المرض.
وبالتالي تشجيع المريض على ممارسة الرياضة والحرص على نظام غذاء صحي ومتوازن، والنوم لفترات كافية وتجنب محفزات المرض، بيساعد المريض على الحفاظ على حياة شبه طبيعية.
عمومًا أكتر حاجة ممكن نساعد بها المريض هي إننا نكون فاهمين المرض وعارفين جوانبه المختلفة علشان نفهمه لما يتكلم عن الأعراض ونقدر ننصحه ونساعده، وندعمه نفسيًا، والدعم النفسي هو أكبر مساعدة ممكن نقدمها لأي مريض متعايش مع مرض مزمن.