محمد ممدوح أو زي ما بيسميه أصحابه “تايسون” نجم طلع بسرعة الصاروخ وحقق نجاحات متتالية، ونقطة انطلاقه كانت من خلال دوره في مسلسل (جراند أوتيل) بشخصية أمين، وبعدها انهالت عليه الإعجابات والإطراءات من الجمهور والنقاد، وانهالت كمان الأدوار الناجحة. وفي عيد ميلاده، هنتكلم عن أدوار محددة عملها وعبرت عن شخصيات مختلفة للراجل بنقابلها في حياتنا.
حازم – لعبة نيوتن
رجل تقليدي يحب يفرض السيطرة، بيحسس دايمًا الست اللي معاه إنها مش هتعرف تتصرف من غيره، وده شوفناه واضح جدًا من الجمل اللي كان بيقولها لمراته (منى زكي) “مش هتعرفى تتصرفي.. انتي فين أنا جايلك.. انتي ما تعرفيش تروحي لوحدك.. انتي بتغرقي في شبر مياه” وخلق بكلامه زوجة اعتمادية مش بتعرف تروح لآخر الشارع لوحدها، وفعلًا بقت تغرق في شبر مياه.
مراد الفرماوي – خلي بالك من زيزي
كان صديق داعم بيقدم مساعدة بدون مقابل، دعم أخته واتحمل مسؤولية بنتها اللي بتعاني من فرط الحركة وتشتت الانتباه، وفضل وراها لحد ما جاب لها مدرسة متخصصة ونفس الدعم ده قدمه لشخصية زيزي اللي بتعاني نفس الشيء، كل اللي كان عايزه إنه يساعد ويسعد الناس اللي حوليه.
طارق- قابيل
جسد في مسلسل قابيل شخصية الراجل المخلص، أخلص لذكرياته مع زوجته وأيامهم حتى بعد وفاتها، وبرغم إن الموضوع قلب معاه بهواجس نفسية وفضل يتخيلها في كل حاجة حواليه، بس ماننكرش إنه ورانا مشاعر إنسانية لعلاقة استثنائية.
أحمد – لا تطفئ الشمس
أحمد، الشخصية التايهة الضايعة اللي مش لايقة شغفها ولا عارفة حلمها إيه، ومع الكوكتيل ده كان توكسيك “سام” مع البنت الوحيدة اللي ساعدته ووقفت وراه، أخد اهتمام وحب من غير ما يسمي العلاقة، ودي من أسوأ الأنواع، إنك تفضل في علاقة بتستنفذك عاطفيًا ومش عارف لها مسمى.
محمد ممدوح قدر يقدم شخصيات حقيقة من لحم ودم، بنتكعبل فيها كل يوم. قولوا لنا أنتم كمان إيه الشخصية اللي قدمها وحسيتوا إنكم قابلتوها قبل كده.