حذرت وزارة الصحة المصرية يوم الأحد المواطنين من تناول أو صيد سمكة القراض بسبب خطورتها على الحياة في حالة أكلها، وأكدت الوزارة في تحذيرها على السمية الشديدة للسمكة، وإن مافيش مصل شافي من سمها لحد النهارده. وأكدت الوزارة كمان إن السمكة المعروفة بالقراض أو النفيخة أو سمكة الأرنب تُعتبر من أكتر الأسماك فتكًا في العالم وأكلها بيتسبب في الموت بشكل أكيد.
في 1 مايو 2022، نشرت جريدة العربي الجديد تقرير عن تحذير الجمعية التونسية للدراسات والبحوث المتعلقة بالحوتيات من انتشار سمكة القراض على السواحل التونسية، وطلبت الجمعية من الصيادين اللي يلاقوها في شباكهم يقتلوها ويرموها في المياه ويبلغوا سلطات الميناء والحرس البحري، وطالبت كمان بأهمية دراسة خريطة السواحل التونسية وتحديد أعداد السمكة.
وأكد تقرير العربي الجديد على انتشار السمكة على سواحل الجزائر والمغرب ومصر وتونس ولبنان، وأتكلم عن موت مواطن لبناني في أبريل بعد أكل السمكة واللي دفع وزارة الصحة اللبنانية لنشر تحذيرات واسعة من خطورة السمكة.
وسمكة القراض معروفة بالاسم ده بسبب وجود أسنان حادة في مقدمة الفم، ومعروفة كمان بسمكة النفيخة علشان بتنفخ الجزء الأمامي من جسمها أسفل الرأس لما تكون خايفة أو مستعدة تهاجم فريسة، وبتتسمى سمكة الأرنب بسبب فمها الصغير وأسنانها اللي تشبه أسنان الأرنب.
الموطن الأصلي للسمكة هو المحيط الهندي، ولكنها عبرت للبحر الأحمر ومنه لخليج السويس وأتنقلت للبحر المتوسط عبر قناة السويس. وعلشان الصيادين في البحر الأحمر عارفين السمكة كويس فلما بيصطادوها بيرموها المياه مرة تانية، ولكن الصيادين في البحر المتوسط ماعندهمش المعرفة الكافية عن السمكة وخطورتها وعلشان كده بدأت تنتشر بشكل كبير في أسواق السمك في الإسكندرية، وكمان بلغت وزارة الصحة عن تسمم 5 أفراد من أسرة في بورسعيد بسبب التسمم الغذائي بعد تناول وجبة من سمكة القراض.
ووضح الدكتور عبدالحكيم إبراهيم، الأستاذ المساعد ومدير وحدة بحوث الأسماك بكلية الطب البيطري جامعة الزقازيق، لـ “العربية نت” إن في تجار بيسلخوا السمكة ويقطعوها على شكل قطع سمك فيليه ويبيعوها للمواطنين علشان يخبوا ملامحها.
ووضح إبراهيم إن وزارة الصحة المصرية نشرت تحذيرات بين المواطنين وفي أسواق السمك وبتعمل تفتيشات دورية على الأسواق، ولو الوزارة لقت السمكة بتعمل محضر وبتصادرها وتاخد الإجراءات اللازمة ضد التاجر اللي بيبيعها.
والسمكة الخطيرة دي في منها 39 نوع بيعيشوا في المياه المالحة، و28 نوع بيعيشوا في المياه العذبة، ولكن انتشارها بأعداد كبيرة خلال الموسم الحالي في شِباك صيادين البحر المتوسط اللي مايعرفوهاش خلاها شكلت خطورة صحية كبيرة على المصريين.
ازاي تتعرف على سمكة القراض؟
هتلاقي جلد السمكة لونه رصاصي أو رمادي وعليه نقط سوداء، وحجم الرأس الكبير بيشكل حوالي تلت جسم السمكة، وعيون السمكة واسعة وغامقة والفم صغير وضيق مع سنتين كبار وحادين ظاهرين من مقدمة الفم الصغير اللي يشبه فم الأرنب، وممكن يوصل طول السمكة البالغة لـ 53 سم، وفي حالة كانت السمكة حية هتلاحظ إن الجزء الأمامي من الجسم أسفل الرأس بيتنفخ في حالة التوتر.
السمكة بتعيش قريب من قاع البحر وبتتغذى على مخلفات الأسماك والطحالب السامة، وعلشان كده عندها غدد بتفرز سم “تيترودوتوكسين” تحت الجلد وفي الرأس والمعدة والأمعاء والمبايض والكبد وحوالين النخاع والخياشيم ولكن السم مش موجود في لحم السمكة. وعلشان كده الصيادين في البحر الأحمر لما بياكلوها بيسلخوا جلدها ويتأكدوا من التخلص من أمعاءها بشكل كامل وتجهيز لحمها بطريقة معينة قبل الطبخ، علشان سمها مش بيتأثر بالطبخ.
أعراض التسمم بسبب سمكة القراض
أتكلمنا مع الدكتور أحمد أبو بكر، أخصائي الباطنة، وقال لنا إن أعراض التسمم بالتيتروديتوكسين بتبدأ بعد 20 دقيقة من امتصاص الأمعاء للسم، ولكن بعض الأفراد ممكن مايظهرش عليهم أي أعراض قبل يومين من التعرض للسم.
وقال أبو بكر إن أعراض التسمم بتشمل إسهال وقئ وغثيان مصاحب لألم شديد في البطن، بالإضافة لحالة من الضعف العام ممكن توصل لشلل في العضلات مع انخفاض في ضغط الدم وانخفاض في معدل ضربات القلب، وممكن تشمل الأعراض تنميل الجسم، وضيق في التنفس وممكن توصل للشلل الكامل والغيبوبة. ولو ماتمش معالجة الأعراض دي خلال 6 ل8 ساعات، أكد أبو بكر إنها ممكن تتسبب في وفاة المريض.
تاريخ القراض في المطبخ الياباني
سمكة القراض منتشرة جدًا في المطبخ الياباني رغم خطورتها الشديدة، وبتُستخدم من أكتر من 2300 سنة، وفيه رسومات وكتابات عنها في المخطوطات اليابانية القديمة، ومن بداية التاريخ الياباني وتعتبر سمكة القراض من أشهى أطباق السمك هناك، وفي طباخين مدربين بحرفية عالية على تنضيف وطبخ السمكة.