قلق وجدل كبير حصل في الأيام اللي فاتت بسبب تداعيات الحرب بين أوكرانيا وروسيا وتأثير ده على المنطقة العربية، وخصوصًا مصر ومن الناحية الاقتصادية على وجه الخصوص. واللي قلق الناس إن مصر بتعتبر من أكبر دول العالم اللي بتستورد قمح. وروسيا وأوكرانيا هما أكتر دولتين مصر بتستورد منهم بنسبة 50% لروسيا و30% من أوكرانيا وده وفقًا لسكاي نيوز.
بس في تصريحات طلعت بعدها من مسئولين منهم المتحدث باسم مجلس الوزراء نادر سعد وقال: إن مصر عندها مخزون استراتيجي من القمح بيقترب من خمسة مليون طن في الصوامع أو المطاحن، وهينضم القمح المحلي لهم بداية من 15 أبريل، علشان يكفي المخزون لمدة تسعة شهور. وفي حوار لإبراهيم عشماوي مساعد أول وزير تموين قال: “إن 84% من وارداتنا من الأقماح من روسيا وأوكرانيا، ولكن مش هنتأثر لإننا اتوسعنا في الرقعة الزراعية وشغالين على زيادتها، بالإضافة لفتح أسواق جديدة للاستيراد. وتابع: “إحنا مش هنتأثر لإننا اتوسعنا في زراعة القمح ورفعنا كفاءة الإنتاج للفدان 3 أضعاف، وعددنا مصادر الإمداد من الأقماح زيّ فرنسا ورومانيا” وعلى أساس ده مصر أكبر دول في العالم عندهم مخزون استراتيجي من القمح.
وبجانب المشاكل المتعلقة بالقمح والعيش في جانب اتكلم عنه الخبراء، وهو مبدأ إن الحرب كلها خسائر على المستوى الإنساني أولًا وبتدفع دول كتير للإفلاس بس هل من مستفيد؟
الحقيقة أه، في دول على المستوى الاقتصادي هتبقى مستفادة وخصوصًا الدول والشركات اللي لهم اتصال مباشر بالنفط وبسبب الحرب وصل سعر برميل النفط لـ 100 دولار لأول مرة من سنة 2014، وأكتر شركة استفادت هي أرامكو في السعودية.
أشار المتحدث باسم مجلس الوزراء المصري نادر سعد إن ارتفاع أسعار حوامل الطاقة على خلفية العملية الروسية في أوكرانيا، ممكن يعود بالفائدة على مصر اللي بتسعى لزيادة صادراتها من الغاز.
وقال: “إن من الممكن تصدير أكبر قدر من الغاز الطبيعي الموجود، ونستفيد من فرق السعر والعملة الصعبة، واللي هتساعدنا على تغطية فارق سعر النفط اللي ارتفع خلال الفترة اللي فاتت.
وتابع إن ده هيكون تفكير اقتصادي مميز إننا نصدر أكبر قدر من الغاز الطبيعي الموجود في مصر، بعد ما نراعي احتياجات المصانع واستخدام الطاقة البديلة”.