مابين إنجازات موسيماني مع القلعة الحمراء وأزمة تجديد عقده بسبب تصريحاته
بواسطة: رحمة حجاج
المدرب الجنوب أفريقي بيتسو موسيماني تولى تدريب النادي الأهلي في أكتوبر ٢٠٢٠. موسيماني بقى عنده جماهيرية كبيرة عند جمهور القلعة الحمراء بالذات بعد ما كسب لقب دوري أبطال أفريقيا موسمين ورا بعض. وكمان بعد ما كسب برونزيتي كأس العالم للأندية ولقب كأس السوبر الأفريقي مرتين وكأس مصر مرة.
بس رغم كل الإنجازات دي كانت كل الأخبار بتقول إن في أزمة في تجديد عقد موسيماني مع النادي الأهلي. علشان موسيماني أثار غضب إدارة النادي بعد ما قال في المؤتمر الصحفي لماتش النادي الأهلي والمقاولون العرب في الدوري المصري في يناير اللي فات، إن طول مدة مفاوضات تجديد العقد ده مش أحسن سيناريو بالنسبة له وإنه مش مبسوط بده.
وقال في المؤتمر الصحفي وقتها: “نتفاوض منذ فترة طويلة جداً مع إدارة الأهلي على تجديد العقد، والآن نتفاوض مرة أخرى، لم نصل إلى اتفاق حتى الآن، وبالتأكيد هذا ليس أمراً جيداً.”
بعد التصريح ده، إدارة النادي الأهلي بقيادة كابتن محمود الخطيب وجهت تحذيراً لموسيماني بعدم الحديث عن الأمور اللي بتخص العقود وتجديدها في وسائل الإعلام والصحافة والإلتزام بقواعد النادي الأهلي في الأمور دي. بس بعد شهر من التصريح ده، موسيماني اتكلم تاني عن تجديد عقده بس بطريقة استنكارية في وسائل إعلام في بلاده وكرر التصرف ده كذا مرة.
وقال وقتها في برنامج إذاعي في جنوب أفريقيا: “لدي ٥ أشهر في عقدي مع النادي الأهلي، ولم نتوصل لاتفاق حول تجديد العقد، أؤمن بأن التجديد سيحدث، ولو لم يحدث ذلك سأكون متفاجئاً للغاية.”
وسائل الإعلام والسوشيال ميديا كان كل كلامها الفترة اللي فاتت إن إدارة النادي الأهلي وصلت لقرار وهو تجديد عقد موسيماني لمدة موسمين بمبلغ ١٨٥ ألف دولار شهرياً مع إمكانية التجديد لموسم تاني. بس لحد دلوقتي مفيش بيان أو تصريح رسمي من القلعة الحمراء يخص الخبر ده. فتعتبر أزمة موسيماني وتجديد عقده مستمرة لحد ما يتم إصدار بيان رسمي من إدارة النادي.
النادي الأهلي بيعتبر إن التصريحات الإعلامية اللي موسيماني كان عنده إصرار غريب خلال الشهور اللي فاتت إنه يصرح بيها في وسائل إعلام بلاده إنها أزمة، علشان العمل في صمت وعدم الظهور الإعلامي بشكل كبير الإدارة بتعتبره إنه من أهم أسباب الإستقرار داخل القلعة الحمراء.