أخطار وجود مراكز تجميل الغير مرخصة وازاي الدولة بتحارب ده

بواسطة: رحمة حجاج

الفترة اللي فاتت ظهر في مصر مراكز تجميل كتير، بس ياترى هل كلهم مرخصين صحيًا ولا لأ؟

للأسف في مراكز تجميل كتير ظهرت في مصر مؤخرًا بس مش مترخصة صحيًا، وكمان الدكاترة اللي بيشتغلوا فيها مش مؤهلين طبيًا. الدولة كثفت مجهوداتها الفترة دي إنها تقضي على كل مراكز التجميل الغير مرخصة علشان تحافظ على صحة المواطنين وكمان علشان مايتعرضوش لأي محاولات نصب.

وزارة الصحة والسكان أعلنت إن الحملات المكثفة اللي بيعملوها دلوقتي على مراكز التجميل دي في كل محافظات مصر، أسفرت عن إنهم ضبطوا أكتر من ٣ آلاف مركز مخالف للتصاريح الصحية. كل المراكز المخالفة دي اتحولت للتحقيق. والدكتور أشرف حاتم رئيس لجنة الصحة في مجلس النواب قال إن أي مركز تجميل هيتم إثبات عليه إنه مش مرخص صحيًا، هيتقفل على طول وهيتم تحويل العاملين فيه للتحقيق. وقال برضه إن وجود أشخاص زيّ دي في السوق الطبي يعتبر كارثة كبيرة.

وزارة الصحة والإسكان قالت إن في مراقبة مستمرة على كل الشئون الصحية في كل محافظات مصر علشان التأكد من التصاريح الصحية. ووزارة الصحة نصحت المواطنين إنهم دايمًا يروحوا للمنشآت الصحية ومراكز التجميل الموثوق فيها والتأكد من التراخيص الصحية والطبية قبل التعامل مع أي شخص بيدعي إنه دكتور تجميل أو مسئول طبي.

من المخالفات اللي الوزارة أثبتتها على المراكز الغير مرخصة هي عدم تطبيق سياسات مكافحة العدوى وإدارة المنشآت من غير أي تراخيص ووجود عمالة غير مؤهلة وغير حاصلة على ترخيص بمزاولة المهنة.

وقال الدكتور هشام زكي رئيس الإدارة المركزية للعلاج الحر والتراخيص، إن كان في أدوية مغشوشة ومنتهية الصلاحية في مراكز تجميل كتير وتم التحفظ على الأدوية دي وتحرير محاضر بكمياتها.

أما بالنسبة للعقوبات الرادعة، فقالت الدكتورة فاطمة طه عضو مجلس نقابة الأطباء: “إن القانون الخاص بتنظيم عمل المنشآت الطبية واضح وعقوباته قاسية، سواء على مستوى غلق المنشأة المخالفة أو الغرامة المالية اللي ممكن توصل إلى ٥٠ ألف جنيه.”
وقال إن في حال صاحب المنشأة أعاد نشاطه تاني قبل ما يتم تصحيح المخالفات اللي بسببها تم إغلاق المنشأة، العقوبة هتكون أشد وهي حبسه لمدة سنة وتغريمه مبلغ مالي كبير.

بجانب العقوبات اللي بتقررها الدولة، المواطنين عليهم واجب كبير تجاه الموضوع ده وهو الوعي الدائم. لازم يكون في وعي تام بالذات في الأمور اللي بتخص الصحة. مش أي مركز تجميل بيوفر خدماته بأسعار رخيصة يبقى مضمون أو موثوق فيه. لازم التأكد من مهنية الأطباء وإن معاهم كل التراخيص الطبية اللي تخليهم يزاولوا المهنة وكمان التأكد من صلاحية الأدوية وإنها مش مغشوشة.

آخر كلمة: خطر مراكز التجميل الغير مرخصة في مصر بقى كبير ولازم يكون في وعي بين المواطنين والحفاظ على صحتهم.

تعليقات
Loading...