الاهتمام بالبيئة والقضايا المتعلقة بيها بقى من أهم الملفات اللي لازم المجتمع يركز عليها، نظرًا للتلوث البيئي والاحصائيات المخيفة المتعلقة بالموضوع، زيّ تنبؤ إن هيكون في بلاستيك في البحر أكتر من السمك في سنة 2050، واللي بمثابة wake up call لينا كلنا بتحتم على الكل التفكير في كيفية إنقاذ البيئة والحفاظ على الطبيعة. ومن تفكير أفراد فعالة في المجتمع في النوع ده من القضايا، ظهر لنا فكرة مهرجان greenish البيئي اللي بيسعى لنشر الوعي عن أهمية التنمية المستدامة وآثار تغيير المناخ.
كل المصريين المهتمين بالبيئة هيكون عندهم فرصة لمعرفة المزيد عن الاستدامة أو الـ sustainability من خلال مهرجان Greenish البيئي، اللي هيبدأ بكرة الموافق 3 من شهر سبتمبر، وهيتم في الجامعة الأمريكية في الحرم اليوناني بالقاهرة. ومن المقرر المهرجان يقام بشكل سنوي، علشان يكون الأول من نوعه في الشرق الأوسط، بيناقش قضايا البيئة وبيساعد على الحفاظ عليها بطرق مختلفة. بحيث هتجتمع مجموعة من المنظمات غير الحكومية والهيئات الحكومية اللي بتعمل على تغير المناخ لمناقشة التعاون وخطط العمل الممكنة لتوسيع الوعي والبرامج المصممة للمساعدة في تقليل مستويات التلوث اللي بيؤدي للـ global warming.
بسبب زيادة مقدار النفايات الموجودة على سطح الأرض والمشاكل البيئية اللي بتسبب ضرر للإنسان والحيوانات وحتى النبات، المهرجان هيشمل مجموعة من ورش العمل المتعلقة بالممارسات الصديقة للبيئة، واللي هيقدر من خلالها الحاضرين إنهم يتعلموا أكتر عن النفايات وكيفية تدويرها بنفسهم وكمان بيتم نقاشات حول القضايا البيئية المُلحة زيّ تحقيق المدن المستدامة وإدارة النفايات. بالإضافة لوجود وقت ترفيهي هيقدم فيه كتير من الفنانين عروض غنائية وموسيقية، وساحة سوق بيتم بيع الاكسسوارات الصديقة للبيئة بالإضافة لساحة الملابس المستدامة.
المهرجان البيئي ده هيكون فرصة لكل شخص مهتم بالبيئة وماكانش لاقي المكان أو الـ outlet المناسب اللي يقدر من خلاله يتعرف أكتر عن البيئة ومشاكلها وكمان أساليب حلها. لو حابين تستفيدوا من المهرجان والفرص اللي هتكون متاحة للحاضرين تقدروا تحجزوا تذكرة للمهرجان، ولو حابين تعرفوا أكتر عن برنامج المهرجان بالظبط، تقدروا تدخلوا على الـ agenda بتاعتهم.
آخر كلمة: ماتفوتوش حضور المهرجان، وماتفوتوش قراءة “وزارة البيئة تطلق تطبيق جديد لشراء المخلفات الإلكترونية من المواطنين“.