وزارة البيئة تطلق تطبيق جديد لشراء المخلفات الإلكترونية من المواطنين

العالم كله بيسعى للحفاظ على البيئة بكل الطرق الممكنة، وكل يوم بتطلع أفكار جديدة ننقذ بيها الكوكب من أي مخاطر وكوارث محتملة، علشان نسعى لتنمية مستدامة للأجيال الجاية. وفي مصر، مبادرات كتير سواء من الدولة أو منظمات المجتمع المدني بتسعى للحد من المخاطر اللي بتهدد البيئة وبتسعى لبيئة نظيفة، وعلشان المخلفات الإلكترونية من أخطر المخلفات اللي لازم ناخد بالنا من طرق التخلص منها، وزارة البيئة أعلنت عن إطلاق أبليكيشن “E-Tadweer” اللي هيتم من خلاله شراء المخلفات الإلكترونية من المواطنين.

الوزارة خصصت التطبيق لشراء المخلفات الإلكترونية من المواطنين، مقابل فلوس أو قسائم لشراء ملابس وأجهزة كهربائية وإلكترونيات. اللابتوب والشواحن والكاميرات لألعاب الفيديو والبلاي ستيشن والموبايلات، دي هتكون المرحلة الأولى اللي هيشتغل على بيعها التطبيق، أما المرحلة التانية هتعتمد على الأجهزة المنزلية كبيرة الحجم زيّ التلاجات والغسالات والبوتجازات وشاشات التليفزيون.

دكتور طارق العربي رئيس جهاز تنظيم إدارة المخلفات بوزارة البيئة، أكد إن الوزارة عندها خطة لكافة المخلفات في كل أنحاء الجمهورية، ووضح إن كمية المخلفات اللي بيتم رفعها يوميًا معروفة وبيتم التعامل معاها بشكل شريع عن طريق المحطات الوسيطة أو إعادة التدوير أو الدفن. قال كمان إن الهدف من المنظومة الجديدة تقليل حجم المخلفات اللي بيتم دفنها، وتحويلها للمصانع اللي بتعيد استخدامها بطريقة علمية ممكن نستفيد منها، وفي عدد من المحافظات هيتم تحويل المخلفات إلى طاقة كهربائية.

آخر كلمة: ماتفوتوش قراءة: نفسكم تحافظوا على البيئة ومش عارفين؟ جبنالكم مجموعة من المبادرات البيئية اللي ممكن تساعدكم

تعليقات
Loading...