في الحلقات الأولى من السباق الدرامي في رمضان السنة دي، حصل أحداث كتير جذبت انتباه المشاهدين واتكلموا عنها في السوشيال ميديا، وحتى لو ماكنتش اتفرجت، أكيد شوفت ميمز أو posts عن الأحداث في المسلسلات، وفي الحلقات دي، كان في غلطات المشاهدين أخدوا بالهم منها واتكلموا عنها في المسلسلات، يمكن الأخطاء دي كانت بسبب إن فريق العمل مش بياخد الوقت الكافي للتحضير، ولقصر المدة اللي المفروض يكون المسلسل جاهز فيها علشان يشارك في الموسم الرمضاني، وضغط أيام التصوير، تعالوا نشوف إيه أبرز الغلطات دي.
كتافة برتبة غلط
في مسلسل ملوك الجدعنة، الناس أخدت بالها في مشهد من اللبس الميري لشخصية من الشخصيات، واللي بيقوم بدور أمين شرطة برتبة ممتاز أول، والكتافة بتاعته فيها أربع شرايط بدل تلاتة.
Hollywood Smile
في مسلسل موسى، انتقد المشاهدين ظهور محمد رمضان بهوليوود سمايل، أو أسنان ناصعة البياض، وده مش بيتماشى مع طبيعة الشخصية اللي بيمثلها وأجواء المسلسل اللي بتدور احداثه في الصعيد وفي وقت الاحتلال الإنجليزي.
أخطاء في التتر
في مسلسل لحم غزال، الناس لاحظت أخطاء كتابية في التتر، من كتابة غلط لأسامي الممثلين وفريق العمل.
إطلالة غادة عبدالرازق
في مسلسل لحم غزال، انتقد الجمهور شكل غادة عبدالرازق بالميكب والفيلر، اللي شايفينه مش لايق على شخصية ست بتشتغل في المدبح، لكن البعض قالوا إن ده متماشي مع سياق المسلسل اللي بان في الحلقات الأولى لإنها مش من الحارة الشعبية في الأصل، وإنها من طبقة أرستقراطية واضطرت تروح تشتغل في المدبح وتكون الشخصية دي لأسباب في السياق الدرامي.
موبايل مقلوب
في مسلسل ضل راجل، المشاهدين لاحظوا في مشهد من المشاهد، ياسر جلال بيتكلم في الموبايل، لكن هو ماسكه بالمقلوب، واتحول الموضوع لسخرية على السوشيال ميديا.