خروجة الويك إند ده مختلفة علشان شهر رمضان، وعلشان التغيير، بيبقى نفسنا نخرج خروجة بليل في الروقان ونتسحر برا، سواء مع أهلنا وقرايبنا أو صحابنا، وبنسمع كل سنة عن أسعار من كوكب تاني للسحور وبنشوف ريسيت يتعمل عليهم ميمز سنة كاملة عن الأسعار الغالية بسبب البيض المدحرج، لو انت هتضحي بمبلغ محترم في سبيل خروجة وسهرة سحور تستاهل، أو لو عايز تخرج وتتسحر برا وعلى قد الإيد وبميزانية يادوب، هنقولك في الحالتين على أماكن مختلفة بأسعار مختلفة.
قدرتنا
بالستايل الأصلي للسحور الشرقي وأجواء رمضان في مصر، على طبلية وبوجود فرق فولكلور، وأكل مصري أصيل وأطباق السحور المختلفة وكلها حاجات حرشة، وبأسعار متوسطة، وموجود في مدينة نصر.
روف فندق الحسين
من أعلى مكان في الحسين، وأساسًا الحسين أكتر مكان تحس فيه بأجواء رمضان في المنطقة كلها، وده أقدم فندق سياحي في الحسين، لما تقعد في الروف هتشوف المنطقة كلها بجمالها وأجوائها اللي هتخليك تعيش ليلة رمضانية ماتنساهاش، السحور للفرد هناك بيبقى فول وسلطة وبيض وجبنة وزبادي بلدي وازازة مياه بـ ٧٠ جنيه شاملة الخدمة و الضريبة.
طبالي
بفروع في فرع التجمع الخامس في مول تاون سنتر، وفي الزمالك والكوربة في مصر الجديدة، وبأصناف الأكل المصري الأصيل على السحور باختيارات مختلفة لكل اللي ممكن تكون بتحبه، وقعدات بديكور لرمضان، وكمان فيه ميزة إنك ممكن تطلب الأكل في البيت.
وح وح
الاسم غريب؟ لا ده كمان عربية فول في التجمع، وبتعمل بيض محشي جمبري وموتزاريلا، سحور غريب شوية لو حابب تغير وتخرج عن اللي متعودين عليه في أطباق السحور، وفيه وجبات بتبدأ من 60 جنيه.
الباز أفندي
بيعمل خدمة تقديم الأكل في العزومات والحفلات، موجودين في حي السفارات، وتقدر تطلب لعزومة أو حفلة ليك ولأصحابك، وكمان عاملين عروض صينية تكفي الشلة كلها وبحوالي 200 جنيه.
jewel elzamalek
في شارع 26 يوليو في الزمالك على رووف الفندق في الهوا الطلق كده، مكان مختلف للسحور ينفع ليك انت وصحابك أو مع العيلة، وكمان مش غالي خالص وفي وجبات مختلفة، وماتنساش تحبس بعدها بالشاي علشان تهضم.