في الأوقات الصعبة اللي بتعيشها لبنان في الوضع الحالي، من أزمات في طابور البنزين وارتفاع للأسعار وعدم توافر الاحتياجات الأساسية وارتفاع كبير في نسبة البطالة ومشاكل وصلت للفوط الصحية، كلها أزمات عاشتها البلد بعد انفجار مرفأ بيروت ولسه بتعيشها للأسف، وده اللي خلى خبراء الاقتصاد يرجحوا احتمالية وصول لبنان لمجاعة وحرب أهلية في الفترة اللي جاية على لقمة العيش.
كل الأحداث دي كانت مادة إعلامية دسمة، استخدمها الإعلاميين علشان يشاركوا ولو بجزء صغير في الحدث أو يقدموا رسالتهم الإعلامية للشعب، وكان من ضمنهم الإعلامي طوني خليفة واللي قدم وجهة نظره عن الأزمة اللي بتمر بيها بلده، وعن السبب اللي وَصَلهم للوضع المأساوي ده من وقت حادثة الانفجار.
طوني خليفة من تصريحاته اللي قالها في حلقة من حلقات برنامجه مؤخرًا، كان شايف إن السبب الأساسي في كل الأوضاع دي، هو الشعب! عنوان حلقته كانت “نحن شعب فاسد ونحن السبب”.
لإنه كان شايف إن كل اختيارات الشعب في الفترة الأخيرة كانت في صالح أي حاجة تانية غير الوطن، من وجهة نظره إن الشعب اختار الزعيم والطائفية والفساد عن الوطن ومصلحته، ولما وافقوا على الفساد كانوا فاسدين أكتر من حكامهم، لإن في عز الأزمة واحتياج الشعب، كان في فئة منهم قامت بأعمال التهريب للبنزين والدوا والعيش والمتاجرة بالدولار.
وإن الشعب خلى الزعيم فوق مصلحتهم، قبلوا بالذل وإن شيء عادي إنك ماتلاقيش الكهربا والمياه والأكل، واتنازلوا عن أبسط احتياجات المواطن، ولحد دلوقتي مش عارفين يجيبوا حق الناس اللي استشهدت في الانفجار، كل ده حصل فيهم من غير أي رد فعل أو موقف منهم، لحد ما بقوا أشبه بدول العالم التالت، و بدل ما يبقوا مواطنيين طبيعيين يطالبوا بحقوقهم، اتحولوا لبلطجية بيقطعوا الطرق.
وبيسأل طوني في أخر الحلقة “إيه اللي ناقصنا علشان نبقى دولة طبيعية قادرة إنها تدافع عن حقوقها وتثور على أوضاع غلط، مش مجرد غنم ماشيين ورا أي مسئول أو زعيم؟”