فسحة الأماكن التراثية والفنية القديمة مش أي حد يحبها، لكن اللي بيحبوها وغاويين الأماكن دي بيلاقوا متعة في الفسح اللي من النوع ده، كتبنا كتير عن أماكن فسح وألعاب مختلفة، علشان خروجة الويك إند اللي بنستناها كلنا، لكن لو انت مش من هواة الكافيهات والمطاعم والألعاب، هنقولك على أحلى متاحف وقصور تستمتع بالفسحة فيها، منهم قصر لسه هيفتح أبوابه للجمهور لأول مرة، ومنهم اللي مش معروف رغم جماله وندرته، تعالوا نشوف إيه الأماكن دي.
قصر القبة
بيفتح أبوابه للجمهور لأول مرة من خلال حفل غنائي للفنانة الكبيرة ماجدة الرومي، اللي هيقام في 2 أبريل الجاي، وانتشرت الصور لأول مرة من جوا القصر اللي يعتبر واحد من أكبر القصور الملكية التاريخية اللي شهد على عصور كتير.
قصر المانسترلي
قصر أثري يعتبر تحفة معمارية موجود على مساحة 1000 متر مربع في جزيرة الروضة في المنيل بالقاهرة، متاح للزيارة بأسعار رمزية، وكمان بيقام فيه حفلات تابعة لوزارة الثقافة والأوبرا.
متحف أم كلثوم
لو هتروح قصر المانسترلي ماينفعش تفوت زيارة متحف أم كلثوم اللي موجود هناك، وبيضم مجموعة من مقتنيات كوكب الشرق من فساتين ونضارات خاصة بيها حتى المنديل بتاعها، وكمان بيضم مقتنياتها الفنية، وموجود فيه قاعة عرض لفيلم قصير عن كوكب الشرق، تقدر تستمتع بكل ده بأسعار تذاكر مش غالية.
قصر عائشة فهمي
يمكن في الفترة الأخيرة هو من أكتر الأماكن اللي بنشوف الناس بتتصور فيها وبتلفت انتباهنا، مفتوح للزيارة بأسعار رمزية، ويعتبر مجمع للفنون، تقدر تشوف فيه تحف معمارية فريدة من نوعها، وكمان تستمتع بالقعدة في مكان على النيل بـ view مالوش مثيل، القصر موجود في الزمالك.
قصر البارون
يعتبر من أحدث القصور والأماكن الأثرية اللي تم فتحها للزيارة للجمهور من فترة قريبة، بعد حكايات وأساطير كتير عليه، بعدها تم تجديده وترميمه علشان يتفتح للجمهور ويكون تحفة معمارية تستحق الزيارة، بناه البارون إمبان اللي يعتبر له الفضل في وجود مصر الجديدة بمعمارها المميز، والقصر موجود فيها.
متحف جاير أندرسون (بيت الكريتلية)
بيتكون المتحف من بيتين هما بيت محمد بن الحاج سالم وبيت السيدة آمنة بنت سالم وتم الربط بينهما بممر (قنطرة) ويعتبروا من الآثار الإسلامية النادرة وبيرجعوا لعصر المماليك والعثماني، بيت الكريتلية موجود في واحد من أعرق شوارع القاهرة القديمة شارع وميدان أحمد بن طولون في حي السيدة زينب، في الزيارة دي هتحس إنك دخلت فيلم من العصر العثماني فعلًا أو مسلسل بيحكي عن الفترة الزمنية دي بكل تفاصيلها.
قصر عابدين
يعتبر أشهر قصور الحكم وشهد على تاريخ مصر الحديث، تحفة فنية نادرة، وده خلاه يتحول لمتحف فخم بيعكس الأحداث التاريخية اللي شهدها، مخصص فيه قاعات لعرض مقتنيات الأسرة العلوية (أسرة محمد علي) وكمان بيضم مكتبة مخصصة.
