لأول مرة في مصر، مسابقة الرجل الحديدي في 2021

مصر هتستضيف مسابقة الرجل الحديدي IRONMAN العالمية في شهر نوفمبر من سنة 2021 في سهل حشيش، ودي أول مرة تُقام المسابقة في مصر بدعم من وزارة الشباب والرياضة، واللي ساعد في تحقيق الحدث الكبير ده هو حسن خليفة الرئيس التنفيذي للشركة المنظمة وهي “ستامينا” Stamina، ووضح إن ده كان حلم كبير بالنسبة ليه وإنه سعيد جدًا بتحقيقه.

عن: road.cc

وكان وزير الشباب والرياضة الدكتور أشرف صبحي حاضر في المؤتمر، وصرح بدعم الوزارة للمسابقة، وإن ده أول تعاون للوزارة مع القطاع الخاص، وإن الوزارة دايمًا بتدعم وهتدعم أي حدث بيحسن من صورة مصر الإيجابية، وكمان قال إن مسابقة الرجل الحديدي هتكون مسابقة مهمة جدًا لإن بيشارك فيها ناس من كل الدول، فهيكون حدث مفيد للسياحة، وإيه أجمل من سهل حشيش ببحره الأزرق، ورماله الناعمة، ومناخه المعتدل لاستقبال حدث زيّ ده.. وشجع الناس والشباب على المشاركة.

عن: veto

وقال ستيفان بيتشينج الرئيس التنفيذي لمجموعة آيرون مان في أوروبا والشرق الأوسط وأفريقيا إن مسافات السباق الثلاثي هتكون في السباحة لمسافة 1.9 كم، وركوب الدراجات لمسافة 90.1 كم، والجري لمسافة 21.1 كم، وهي مسابقة بتعتمد على اللياقة البدنية وقدرة التحمل، وأكد إن مفيش أي شروط للتقديم في المسابقة، والسن هيكون من 18 سنة لـ 77 سنة تقريبًا.

آخر كلمة: قدامك سنة كاملة علشان تجهز نفسك للمسابقة.. وماتفوتوش قراءة: “حورس” تميمة كأس العالم لكرة اليد 2021 في مصر بمشاركة ست منتخبات عربية.

تعليقات
Loading...
Tweet
Share
Share
Pin