لأول مرة: آمون ستار صورت أحدث أغانيها في قصر شامبليون

بأول فيديو كليب يتصور في قصر شامبليون، المغنية الأمريكية آمون ستار أطلقت أحدث أغانيها “I Tried to Tell You” واللي اختارت تصورها في مصر، تحديدًا في قصر شامبليون في وسط البلد، وبيعتبر من أهم المعالم التاريخية في المنطقة، وتم تصوير الكليب بالكامل فيه، ودي أول مرة تحصل، لكن مش أول مرة آمون ستار تختار تصور فيديو كليب ليها في مصر!

أغنية “I Tried to Tell You” هي تاني أغنية يتم إطلاقها من مشروع ألبوم آمون الجديد، االلي يعتبر انطلاقة جديدة في مسيرتها الفنية للعالمية من قلب مصر، لإن كمان اسمها الفني اللي اختارته مستوحي من الحضارة الفرعونية القديمة، وهو اسم إله الشمس عند قدماء المصريين.. والألبوم بيضم 10 أغاني، لكن هيتم طرحه بشكل مختلف، باطلاق كل أغنية لوحدها بفيديو كليب.

دي مش أول تجربة تصوير فيديو كليب في مصر لآمون ستار، لإنها صورت أول كليب من الألبوم لأغنية “It Was Just A Kiss” في منطقة الأهرامات، تحديدًا داخل مقبرة خوفو الأثرية، ووقتها حصلت ردود فعل مختلفة لكنه حقق نجاح جماهيري، خصوصًا إنه أول فيديو كليب يتم تصويره داخل المكان الأثري المميز ده. لكن آمون بتخطط لإن كل أغنية من الألبوم يتم تصوير الفيديو كليب الخاص بيها في أماكن أثرية مختلفة وكلهم هتكون التجربة فيهم لأول مرة.

آمون ستار، أو  أليز ليبيك، مطربة وملحنة أمريكية الأصل، واستقرت في مصر من 5 سنين، وابتدت طريقها للعالمية بحصولها على جوائز موسيقية مختلفة، منهم “Hollywood Music In Media Awards” عن أغنيتها “We Are All Inflected”. ده غير حصولها على جائزة Global Music Awards المشابهة لجوائز الجرامي عن ألبومها السابق Origin، اللي شاركت خلاله بثلاث أغنيات صوفية مع المنشد محمود التهامي.

آخر كلمة: ماتفوتوش قراءة: أفضل موسيقى تصويرية شوفناها في أفلام السينما المصرية الحديثة

تعليقات
Loading...
Tweet
Share
Share
Pin