المرأة هي سر الكون: كلمات للفنانة إيمان أسامة بمعرضها دانتيل في بيكاسو إيست جاليري
بواسطة: ساره علي
في بيكاسو إيست جاليري ومع حضور السفير الأردني والفنان أحمد شيحا وبنته الفنانة هنا شيحا، حضرنا معرض دانتيل للفنانة إيمان أسامة وسألناها إيه سبب اختيارها دانتيل كعنوان للمعرض. وهي جاوبتنا على بعض الأسئلة.
إيمان أسامة هي فنانة تشكيلية اتخرجت من كلية الفنون الجميلة، اشتغلت كمعيدة وبعدها حصلت على الماجيستير والدكتوراة. واتعينت في الكلية كمدرس في قسم الجرافيك. إيمان أسامة بتهتم جدًا بالمعارض وشاركت في كتير منها. كمان حصلت على جوائز زيّ جائزة صالون الشباب سنة 2007. وجائزة أحسن الرسائل العلمية في مجال الفنون من جامعة حلوان وغيرهم.
ليه دانتيل عنوان المعرض؟
اتكلمنا مع إيمان ليه اختارات دانتيل كعنوان للمعرض وردها كان دانتيل رمز أنثوي. وعلشان المرأة في اللوحات مش بشكلها المعتاد فكان الدانتيل هو رمز للمرأة علشان من خلال اللوحات بتعبر إيمان عن المعنى الحقيقي للمرأة. فهي جزء من المجتمع، وطلباتها بسيطة جدًا. وبالنسبة لها المرأة بتقدم تضحيات كتير علشان تحافظ على الأسرة وتبنيها، واللي هي ممكن تحتاجه بعد كل ده هو الإهتمام والتقدير, حتى لو وردة واحدة. وكمان إن شريكها يكون فاهم ومقدر التضحيات اللي بتقدمها من وقت للتاني. فمن وجهة نظرها المرأة محتاجة بس الأمان والتقدير.
ازاي اللوحات بتوصف مشاعر المرأة من خلال التحليل الجمالي للوحة
إيمان أسامة بتقول لنا رغم إنها مستخدمة اللون الأحمر، فبغض النظر عن كونه لون رومانسي، فهو لون صارخ وبيعبر كمان عن شعور الغضب أو الشحنة الانفعالية. ده غير إنه بيعبر عن حال الدنيا السريع. وكمان بيعبر عن وجود الأفعال العدوانية اللي مش هنقدر نلغيها من المجتمع بس كمان نقدر نظهر الحاجات الحلوة اللي تطغي على الوحش الموجود. وده اللي عملته إيمان أسامة بوجود الألوان الباردة. الدانتيل, الورد اللي طغى على اللون السخن (الأحمر).
“الأنثى هي سر الكون” من الكلمات اللي بتعبر بيها إيمان عن المعرض
لو بصينا لأي حاجة هنلاقي إن الأنثى حقيقي هي سر الكون. الكون مش لازم يكون بمعناه الكبير، ممكن يكون الأسرة. فالمرأة هي اللي بتخلق الجو المناسب للأسرة وبتكون سبب في الجانب الجمالي فيه. وأكيد ده مع مساعدة الرجل لكن هي بتكون الجزء الأساسي. المرأة حقيقي بتمثل سر كبير من الكون، ودليل إن كتير من الفلاسفة وشعراء إلهامهم بيدور عن المرأة أكتر من الرجل.
فكرة المعرض والشخص الملهم لإيمان أسامة
كل فنان بيختار موضوع بيحب يتكلم عنه ممكن يكون بيمسه شخصيًا أو مجرد إنه بيحب يتكلم عنه. إيمان أسامة من الفنانين المهتمين بالمرأة. وفكرة المعرض كانت بسبب اللي بتعيشه حاليًا مع زوجها، وهو الطمأنينة، والاستقرار الزوجي، وتحقيق الذات وسط عالم معاصر، ومساعدته ليها في تحقيق طموحها. إيمان أسامة بتقول إن البطل الحقيقي ورا المعرض هو زوجها. فهو قادر يفهمها ويحققلها الأمان. ده غير دعمه ليها المستمر، وده اللي كانت بتحاول توصله من خلال اللوحات، إن المفهوم الصح لمعنى المرأة هو احتياجاتها البسيطة اللي لو الراجل قدر يوفرها هيعيشوا بسعادة هما الاتنين. كمان في واحدة من اللوحات سجلت تاريخ جوازهم وقالت من ضمن الحاجات البسيطة إنه مثلًا ماينساش الذكرى اللي جمعتهم, وختمت إيمان كلامها بإن الحياة مع زوجها هي مصدر إلهامها.