حاجات موجودة في مجتمعنا وبنعاني منها، ويمكن من غير ما نحس إنها قضايا كبيرة، أو علشان مش بنسمع عنها كتير، وماشوفناهاش بتتناقش في مسلسلات أو أفلام بتعبر عن واقعنا، لكن مش لاقيين حل مناسب ليها، منهم الأمراض النفسية اللي ممكن نكون بنعاني منها أو بيعاني منها القريبين مننا واحنا مانعرفش، وبنفسر سلوكهم بطريقة سيئة، ومنها قضايا شائكة زيّ الطلاق الشفهي، شوفنا القضايا دي بتتناقش السنة دي في مسلسلات رمضان، تعالوا نشوف ازاي الدراما ناقشت المواضيع دي، وهل ممكن نشوف حلول قانونية ومجتمعية ليها بعد التأثير ده من الدراما؟
في مسلسل “خلّي بالك من زيزي”، شوفنا حاجة مهمة بيتم مناقشتها على مستوي أجيال مختلفة بأعمار مختلفة، شوفنا نتيجته على زيزي وهي كبيرة، وبنشوف بوادره على تيتو وهي صغيرة، اضطراب فرط الحركة أو ADHD، اللي يعتبر مرض نفسي، مفيش ناس كتير تعرف عنه، ويمكن المعظم سمع عنه لأول مرة من خلال المسلسل، وأسر كتير بنتمنى تعرف عنه أكتر علشان تعرف ازاي تتعامل مع أولادهم لو اكتشفوا عندهم الاضطراب ده من سن مبكر، علشان يمنعوا مشاكل تانية كتير إنها تحصل، واتسبب المسلسل في إن ناس أكتر تعرف عن الاضطراب ده وتقرا عنه وتدور على حلوله، ده غير الإنجاز اللي شوفناه لناس قالوا إنهم بسبب المسلسل، مابقوش يتكسفوا من إنهم يروحوا لطبيب نفسي علشان يحلوا مشاكلهم بطريقة صحيحة وعلمية، وده أكتر تأثير إيجابي ممكن تقدمه الدراما للمجتمع، إنها تأثر في الناس بشكل إيجابي.
وفي مسلسل لعبة نيوتن، بنشوف صراع مستمر عن قضية شائكة وهي الطلاق الشفهي، والعدة، وازاي ممكن الزوج يرد الزوجة لعصمته من غير علمها، أو يسيبها بكلمة طلاق من غير قسيمة وأوراق رسمية، وتفضل “زيّ البيت الوقف” الكلمة اللي بنسمعها كتير، القضية بقت محل نقاش من الناس بعد ما اتطرحت في المسلسل، وبين جدال فقهي وقانوني عن الأسباب والنتائج اللي بيؤدي ليها الطلاق الشفهي، هل ممكن قريب نشوف نتيجة حاسمة للجدل ده خصوصًا بعد التقدم اللي بنعيشه ووصل فيه إن الطلاق بقى على الواتساب؟
