#سكوب_أمل: قابلوا نسمة يحيى صاحبة أول براند ملابس لقصار القامة في مصر

نسمة يحيى هي شابة من مُحبي الموضة والأزياء، وعندها ذوق خاص في اختيار لبسها. ومن عشقها للموضة، اتجهت نسمة لمجال عروض الأزياء وقدرت تبقى أول عارضة أزياء من قصار القامة فى مصر على الرغم من كل اللي كانت بتواجهه طول حياتها من تنمر وصعوبة في إيجاد ملابس مناسبة ليها بسبب عدم وجود محلات بتبيع هدوم لقصار القامة في مصر كلها.

وعلشان كده كانت بتتجه دايمًا لحل مشكلتها مع الملابس عن طريق شراء قماش وتصميم لبسها على ذوقها وبعد كده توديه لترزي يفصله، ولأن المشكلة دي بيواجها تقريبًا كل قصار القامة في مصر، قررت إنها تعمل بنفسها أول براند متخصص لملابس قصار القامة بأذواق واستايلات مختلفة.

عن: اليوم السابع

أصدرت نسمة أول كوليكشن من تصميماتها للبراند من كام يوم، والكوليكشن ده بيضم ست تصميمات بتناسب أي بنت مهما كان طولها أو وزنها، أو حتي فئتها العمرية سواء أطفال وكبار. وبدأت نسمة مشروعها من غير أي دعم مالي، وهي بتتيح التوصيل لكل محافظات مصر من خلال شركات الشحن أونلاين.

نسمة طالبة بكلية التربية جامعة المنصورة، ونفسها تكمل دراستها للماجيستير وتبقى أستاذة في الجامعة، مع استمرارها في تحقيق حلمها في عالم الأزياء اللي بتحلم تنافس فيه بمشروعها عالميًا. وهي شغالة حاليً على تصميم الموقع الإلكتروني الخاص بالبراند بتاعها، وبتدور على داعم مالي للبراند علشان تقدر تستمر، وتعمل تصميمات أكتر لكل الفئات، وتكبر مشروعها الأول من نوعه في مصر.

آخر كلمة: بنشجع كل شخص بيجتهد في الوصول لحلمه مهما كانت الظروف

تعليقات
Loading...
Tweet
Share
Share
Pin