#سكوب_أمل: دكتور بيعزف موسيقى لمرضى الكورونا في مستشفى العزل

من بداية ظهور جائحة فيروس كورونا، ومن ضمن التعليمات والإجراءات اللي عرفناها علشان نقاوم المرض ده هي الصحة النفسية للمريض، باختلاف الأساليب اللي بنساعد بيها المرضى لرفع روحهم المعنوية وتغيير الموود بتاعهم لمواجهة الفيروس، علشان الصحة النفسية بتفرق جدًا لقوة المناعة، اللي في الأصل ليها الدور الرئيسي لمقاومة الفيروس جوه الجسم، وفي تونس دكتور في مستشفى عزل قرر إنه يعمل حاجة جميلة ومختلفة ترفع من الروح المعنوية لمرضى فيروس كورونا، وهي إنه يعزفلهم بآلة الكمان في المستشفى.

علشان الموسيقى هي اللغة اللي كلنا بنفهمها ونحسها، ومن أكتر الحاجات اللي بتفرق في نفسيتنا وتغير مزاجنا للأحسن، وفيه دراسات علمية كمان بتقول إن الموسيقى بتأثر في حالة المرضى وبتساعد في الشفاء بسرعة، وده عن طريق رفع الروح المعنوية، الدكتور محمد السيالة قرر إنه يستخدم الطريقة الجميلة دي في مستشفى بمدينة صفاقس، علشان يساعد مرضى الكورونا.

الدكتور بدأ في التجربة من يوم عيد الحب، وتجول في المستشفى لمرضى كورونا، ولما المرضى فرحوا بالمبادرة الجميلة دي منه، كرر نفس الفكرة لكن مع مرضى السرطان، ومن بعدها انتشرت الفيديوهات اللي بيعزف فيها الدكتور في كتير من المواقع ووكالات الأنباء.

المرضى عبروا عن امتنانهم وإعجابهم بعزف الطبيب اللي دخل البهجة على قلوبهم، وطالبوا باستمرار التجربة لسرعة تعافي المصابين فى مستشفيات العزل فى تونس كلها.

آخر كلمة: ماتفوتوش قراءة: عيادة النباتات: طبيب أردني ملى عيادته بمئات النباتات لأكتر من 35 سنة

تعليقات
Loading...
Tweet
Share
Share
Pin