مصطفى شعبان أو (سعيد) في (الحاج متولي)، ممثل مصري على مدار مشواره الفني كان له تقلبات في نوعية الأدوار اللي قدمها، ساعات تتعاطف معاه من كتر طيبته وإنه ابن حلال وساعات بيبقى بتاع بنات أو “باد بوي” وساعات بيقلب 180 درجة ويبقى الولد الشبيح بلطجي المنطقة وصاحب أجدع قاموس للحكم التوكتوكية.
رحلة “وليه طيب علشان طيب”
دي كانت بدايته في التمثيل، عمل مجموعة من الأعمال الفنية السينمائية والدرامية كان طالع فيها بدور الطيب والبريء، منهم دوره في فيلم (فتاة من إسرائيل) اللي أخد عليه جائزة أحسن ممثل ودوره في فيلم (خلّي الدماغ صاحي) اللي كان طالع فيه بدور موظف غلبان على قد حاله كل همه يحوش فلوس ويتجوز، بس الانطلاقة للطيب الحقيقي اللي جت عليه الدنيا كان دور سعيد في المسلسل الشهير (الحاج متولي).
الرومانسي الحالم
ودي كانت مرحلة جديدة بدأها بعد سلسلة من الطيبة، الرومانسي البطل في فيلم (أحلام عمرنا) وجملته الشهيرة “ماحدش بينجرح أوي إلا لما يحب أوي” وفيلم (جوبا) اللي كان طالع فيه الشاب الرومانسي وشخصية علي “المسبلاتي” في (فتح عينيك).
كل البنات بتحبك كل البنات حلوين
المرحلة دي طوّل فيها شوية، شوفنا شخصيات بتدور حوالين الزوج أو الأب أو العازب بتاع الستات، يوقعهم من كلمة أو نظرة، ماننساش دور الحاج في مسلسل (الزوجة الرابعة) اللي اعتبره الجمهور تكملة لمسيرة والده الحاج متولي في تعدد الجواز، انتقالًا لدوره في مسلسل (أبو البنات) و(دكتور أمراض نسا) و(مولانا العاشق) و(العار) كلها تمحورت عن الستات.
شبح المنطقة
ودي لسه داخل فيها مؤخرًا من خلال دوره في مسلسل (ملوك الجدعنة) ومسلسل (بابا المجال) اللي اتعرض في رمضان اللي فات، وكان فيه شبح وبيطلع يثبت الناس أه، بس في نفس الوقت جدع بيخاف على ابن منطقته.
مصطفى شعبان في نص المسيرة كان عمل دورين مختلفين، فيهم كمية شحتفة وعياط كبيرة، وهما (أيوب) و(أبو جبل) ودول من وجهة نظر الجمهور أبرزوا قدرات مصطفى شعبان التمثيلية وحققوا نجاح جماهيري كبير وكانوا نقلة بين رحلة “كل البنات بتحبك كل البنات حلوين” ومرحلة “شبح المنطقة”.