جمعنالكم أحلى إعلانات في شهر رمضان السنة دي

في السنين الأخيرة، الإعلانات بقت جزء لا يتجزأ من أجواء رمضان كل سنة، والشركات بقت بتتنافس عشان تقدم أحسن إعلان الناس تتكلم عنه طول الشهر الكريم، وبالرغم من أزمة فيروس الكورونا المستجد والحظر اللي العالم العربي كله بيعاني منه، إلا إن الشركات حرصت على إنها تقدم مجموعة إعلانات ليها صلة بالأحداث وبتحاول تهون الموقف الصعب ده على أغلبية المشاهدين. شركات تانية قررت تاخد طريق تاني زي البنك الأهلي اللي قرر يلغي حملته الإعلانية السنة دي ويتبرع بقيمتها كلها لمواجهة انتشار عدوى “كوفيد-19”.

وعلى الرغم من إن كله بيقول إنه مش بيحب الإعلانات بسبب طول الفواصل الإعلانية في رمضان، إلا إن مع الوقت الشركات قدرت تخلق إعلانات جذابة ودايمًا بيكون في أغاني أو نغمات بتلزق في دماغنا مش بنعرف نطلعها، وبنستناها من إعلان لإعلان، عشان كده قررنا نجمعلكم أحسن إعلانات السنة دي.

اورنج

إعلان اورنج تحت عنوان “#وحشتنا_اللمة” بيحكي إزاي الناس قدرت تتجمع أونلاين بالرغم من فيروس كورونا المستجد. الإعلان بيركز على كذا قصة أم بتتكلم مع إبنها، جد وجدة بيتكلموا مع بنتهم وحفيدتهم وأسرة بتتكلم مع أب بيشتغل على بريمة بترول، كلهم مفرقاهم المسافات، لكن في أخر الإعلان كله بيتجمع وبيتلم تاني. أغنية الفنان الإماراتي حسين الجسمي إدت للإعلان ده طعم تاني خالص.

فودافون

شركة فودافون السنة دي بدل ما تعمل إعلان في لوكيشن كبير قررت تعمل إعلان بسيط عن لمة العيلة في رمضان وأهمية الوقت اللي بنقضيه سوا مع بعض في البيت. الإعلان في نجوم كبار زي محمد صلاح ومنى ذكي وأمير عيد.

بنك مصر

يمكن من أحسن إعلانات بنك مصر اللي إتعملت في السنين الأخيرة؛ الإعلان فيه إتنين من أحسن المغنيين في مصر محمود العسيلي وبهاء سلطان اللي أبهر الكل بالجزء بتاعه في الأغنية.

وي

إعلان وي خد شكل مختلف، وقرروا يركزوا على عروضهم الجديدة اللي هيقدموها للمصريين بما إن معظمنا هيكون قاعد في البيت واستخدامنا للإنترنت هيزيد. الإعلان فيه أغنية جميلة وكوميدية مش هتعرف تخرجها من دماغك بسهولة لفترة بعد ما رمضان يخلص.

إتصالات

يمكن من أحسن الإعلانات اللي اتعملت واتحول لتريند في ثواني، إعلان أحمد حلمي مع إتصالات اللي فيه بيغني أغنية من أحلى الأغاني اللي ممكن تسمعها رمضان ده عن الوضع اللي بنمر بيه. في الإعلان حلمي بيلخص يومه في الحظر، وصدقنا مش هتقدر تمسك نفسك من الضحك.

زين

إعلان زين السنة دي كان فيه رسالة جميلة عن التباعد الاجتماعي اللي حاصل بسبب جائحة كورونا وإزاي كلنا بالرغم من كل اختلافتنا شبه بعض لإن في نهاية اليوم كلنا أبناء لكوكب الأرض وكلنا متأثرين بشكل متساوي بالأزمة دي.

أخر كلمة: متنساش تعرفنا أحسن إعلان بالنسبالك في الموسم ده!

تعليقات
Loading...
Tweet
Share
Share
Pin