المختصر المفيد لاختيار أجمل هدية في الكريسماس

الكريسماس خلاص وصل ومعظمنا بيفكر يشتري إيه هدايا للناس القريبة منه، سواء secret Santa في الشغل أو أصحابك وقرايبك وأهلك. والهدايا عنصر مهم جدًا في علاقاتنا بالناس اللي بنحبهم علشان الهدايا هي تعبير عن الحب والاهتمام وبتدي إحساس دافي بالمحبة والطمأنينة.

بس ممكن اختيار الهدية يكون متعب شوية علشان أغلبنا بيُقف مشوش قدام فكرة شراء هدية لحد، وبنبقى مش عارفين نشتري إيه بالظبط، يعني إيه اللي ممكن يبسط الشخص ده؟

علشان تشتري هدية جميلة في الكريسماس أو أي وقت تاني وتقدر من خلالها تبسط الشخص ده لازم تعرف الشخص كويس وتفهمه وتفهم إيه اللي بيبسطه، وأجمل هدايا اللي بتكون شخصية وبتعبر عنك وعن الشخص اللي هيستلم الهدية.

يعني شوف الشخص ده بيحب إيه، بينبسط من إيه، وخلي الهدية حاجة خاصة بيه أو بيها، يعني لو الحد ده بيحب ألعاب الفيديو شوف إيه أكتر هدية شغلاه الفترة دي وممكن تجبهاله، أو لو كان بيحب الهدوم ممكن تشوف ستايل لبسه وتحاول تجبله قطعة ممكن يحبها.

ممكن يكون الشخص بسيط وبيحب القراية فتشتري له كتاب هو مهتم بيه، أو يكون بيحب المزيكا والفنون فتشتري له تذكرة لحفلة في الأوبرا مثلًا. أو لو بيحب المطبخ مثلًا ممكن تشوف إيه اللي ناقص عنده في المطبخ من أجهزة وأدوات وتجبهاله.

الحاجات دي بتبقى بسيطة لكن قيمتها عند الشخص اللي بيستلم الهدية بتبقى كبيرة، لإنها مش مجرد هدية بس لأ، ده تعبير عن إنك فاهم الشخص وعارفه ومهتم بيه وبتفاصيل حياته.

ابذل مجهود علشان تعرف تفضيلات الشخص اللي قدامك واختار الهدية على الأساس ده، المجهود اللي بتبذله في الهدية بيبان فيها أكتر بكتير من الفلوس اللي دفعتها.

وممكن لو عملت هدية بنفسك بتكون أحلى بكتير من الحاجات اللي ممكن تشتريها جاهزة. يعني لو الشخص اللي عايز تشتري له هدية بيحب الأكل ممكن تعمل له عشا وتعزمه عندك في البيت، ده هيخلق جو جميل من الدفا والطمأنينة. أو لو تعرف تعمل شغل يدوي زيّ الخشب والزجاج والاكسسوريز ممكن تعمل حاجات من دي كهدايا والناس هتحبها وهتقدرها جدًا خصوصًا لو أنت اللي عاملها بنفسك.

كل ما كانت الهدية شخصية أكتر وبتعبر عن قد إيه أنت بتعرف الشخص اللي بتقدم له الهدية، كل ما الشخص ده ما هيبقى مبسوط أكتر بالهدية دي علشان قيمتها عنده بتكون أكبر بكتير من أي حاجة تانية.

آخر كلمة: ماتفوتوش قراءة: ليه كلنا محتاجين نكسر الدايرة ونحكي عن أي حاجة بتحصل لنا؟

تعليقات
Loading...
Tweet
Share
Share
Pin