في مهرجان كبير زيّ مهرجان القاهرة السينمائي الدولي، اللي يعتبر من أكبر وأقدم المهرجانات العربية اللي بتدعم السينما وبتقدمها لأكبر عدد من الفنانين والمشاهير عالميًا، نقدر من خلاله نشوف الأفلام المصرية المختلفة في الـ 5 سنين اللي فاتوا، وإزاي صناعة السينما في مصر بتتغير وهل للأحسن ولا الأوحش؟ وإيه القضايا اللي بتهتم بيها الأفلام وإزاي اختلفت في السنين دي؟
2020
السنة دي بيشارك في المهرجان 10 أفلام مصرية، وده رقم كبير بالنسبة للسنين اللي فاتت، بتتنوع بين الروائي والتسجيلي الطويل والقصير، منهم فيلم “حظر تجول”، بطولة إلهام شاهين وأمينة خليل وأحمد مجدي، وإخراج أمير رمسيس، والفيلم بيدور عن أم بتخرج من السجن بعد سنين في 2013، وخلال 24 ساعة بس بيمنحها حظر التجول المفروض على البلد وقتها، فرصة للتحرر من ماضيها، ودي نوعية أفلام مختلفة مشوفناهاش غير بعد ثورة 25 يناير، وبتبقى واقعية وبتعبر عن الشارع المصري.
كمان من المشاركين فيلم “ع السلم” للمخرجة نسرين الزيات، وبيرصد إزاي الكاميرا ممكن تساعد المخرجة الشابة إنها تحتفظ بالماضي كذكري جميلة، وكمان معايشة الحاضر كلقطة ملونة، والنظر للمستقبل من غير خوف.
2019
مشاركش في الدورة دي غير فيلم مصري واحد هو فيلم “احكيلي” للمخرجة ماريان خوري، وفاز بجايزة الجمهور واللي بتحمل اسم الناقد الكبير والمدير الفني للمهرجان الراحل يوسف شريف رزق الله.
2018
في الدورة الـ 40، شارك 6 أفلام مصرية، أشهرهم فيلم ليل خارجي، وهو الفيلم المصري الوحيد اللي شارك في المسابقة الدولية للمهرجان.
وفيلم “لا أحد هناك”، فيلم روائي بتدور أحداثه في شوارع مدينة فاضية مفيهاش غير أشباح، والبطل بيلاقي نفسه تايه فيها وبيتطلب منه مساعدة بنت ومن خلالها هيتورط في مشاكل تانية هتوديه لاكتشاف.
وفيلم “ورد مسموم”، بطولة محمود حميدة وصفاء الطوخي، ومأخوذ عن رواية للكاتب أحمد زغلول الشيطي، بتدور حول بطل عايز يهاجر من مصر ويهرب من ظروف المعيشة الصعبة ومهنته في المدابغ، وأخته بتعمل كل المحاولات لمنعه، لحد ما بيقع في قصة حب مع بنت وبتستغل الفرصة دي في منعه من الهجرة الغير شرعية.
2017
كانت المفاجأة غياب كامل للأفلام المصرية وقتها في الدورة الـ39، وبيرجع غياب الأفلام المصرية لضعف تمويل الأفلام الجادة وعدم قدرة السينما المستقلة اللي بتعتمد على ميزانيات متواضعة، إنها توصل لمستوى مهرجان كبير ومهم زيّ مهرجان القاهرة.
2016
أشهر 3 أفلام شاركوا في الدورة الـ 38، “يوم للستات”، وده كان في الافتتاحية، من إخراج كاملة أبو ذكري، وإنتاج وبطولة إلهام شاهين، ونيللي كريم، ومحمود حميدة، وفاروق الفيشاوي، وغيرهم من النجوم الكبار.
وفيلم “البر التاني”، وبيناقش الفيلم قصص مجموعة من الشباب المصريين بعد خروجهم من القرى الفقيرة في الريف، بتجمع بينهم محاولة الهجرة إلى إيطاليا في هجرة غير شرعية على قوارب صيد متهالكة، وعلى أضواء الساحل الإيطالي بتلمع في عينهم آمالهم في حياة أحسن ليهم وللي بيحبوهم، في وسط ما بتتلاعب بيهم أمواج غادرة.
وفيلم “لحظات إنتحارية” بتدور فكرته عن اكتشاف مجموعة من الناس إن القرارات اللي خدوها طول حياتهم كانت مبنية على أكاذيب، وفي الحالة دي كان لازم من الاختيار بين الرجوع أو الاستمرار في ظل الأكاذيب.
