لبنان حظها في 2020 ماكنش أحسن حاجة فهي عانت من انفجار مرفأ بيروت وعانت من غلق عام اللي كل البلاد عانت منه بسبب جائحة فيروس “كوفيدـ19” واللي أثر على الحركة العامة في كل المجالات، فاقتصاد لبنان مر بأسوء الحالات السنة اللي فاتت، وشكلها السنة دي كمان، لإنهم أعلنوا إنهم هيعملوا غلق عام للمرة التالتة بسبب انتشار الفيروس، ولبنان هي من أجمل البلاد العربية والعالمية كمان، ومن أقدم البلاد، وفيها مدن جمالها خلاب وطبيعتها تاخد العقل، والمدن دي كلها هتوحشنا مع الغلق ومع قلة حركة السفر اللي مفروضة بسبب الحد من انتشار الفيروس.
والمدن كلها فيها مناطق وأماكن تتزار وجذابة للسياحة ومناظرها الطبيعية ساحرة وتخلينا حاسين بهدوء وأمان، وعلشان كده، هنتفرج مع بعض عليهم، وبننصحكم تسافروا للمدن دي أول ما الدنيا تكون أحلى، والظروف تتظبط.
جبيل
مدينة جبيل هي من مدن لبنان الأثرية، ومن المدن القليلة على مستوى العالم اللي لسه موجودة من وقت إنشائها سنة 5000 قبل الميلاد، ومن أهم الأماكن اللي لازم تزوروها هناك قلعة جبيل، والسوق القديم، ومنطقة جبيل القديمة، وشارع جبيل القديم.
دير القمر
من المدن اللي بيجيلها سياح كتير في العموم، ويستمتعوا بزيارة المعالم السياحية الجميلة المختلفة، ومن أهم المعالم دي المتاحف، والكنائس، وكمان يقدر السياح إنهم يشوفوا أجمل اللوحات الأثرية والرسومات الجذابة.
دامور
من المدن القليلة في الساحل اللبناني اللي ليها شاطيء رملي جذاب، وبيجيلها السياح من كل مكان وخصوصًا اللي بيحبوا الرياضات المائية، وكمان فيها 6 كنائس أكبرها كنيسة نوتردام، وسانت إلياس، وسانت ميشيل، وسانت تيكول وغيرها من الكنائس التانية القديمة والحديثة.
صيدا
فيها أماكن كتيرة للسياحة زيّ متحف الصابون اللي بيعمل عروض عن إزاي الصابون بيتصنع في الشرق الأوسط، وقلعة صيدا، وقصر دبانة، وسوق صيدا القديم.
جونيه
من المدن الجميلة واللي فيها أماكن سياحية جميلة زيّ مزار سيدة لبنان في حريصا، ومغارة جعيتا، ومنطقة كسليك في كسروان، وسوق جونيه القديم، دا غير الشواطيء الساحرة اللي هناك.
بعلبك
مدينة بعلبك، مدينة الشمس، واحدة من أهم مدن لبنان السياحية، وفيها أماكن تراثية كتيرة زيّ الآثار الرومانية، وقلعة بعلبك، ونهر الليطاني، والجامع الأموي الكبير.