خلال مؤتمر صحفي أقيم على هامش مهرجان الجونة السينمائي في دورته الرابعة، أعلنت المؤلفة مريم نعوم عن مسلسلها الجديد “القاهرة”، اللي كانت بتحلم بتنفيذه من 10 سنين، واللي هيكون من 5 روايات للأديب العالمي نجيب محفوظ، بتجمعهم كلهم روابط الشخصيات والأحداث في القاهرة، ومن هنا جه اسم المسلسل، اللي هيكون من إخراج تامر محسن، وهيتعرض الموسم الأول منه في 2022، وهيكون 8 حلقات.
الروايات اللي هيتعمل منها المسلسل هي: “القاهرة الجديدة”، و”ثرثرة فوق النيل”، و”الكرنك”، و”اللص والكلاب” و”الطريق”.. وضحت نعوم إزاي هتقدر تعمل مسلسل واحد من الخمس روايات المختلفة دي، عن طريق إنها هتأخد من كل رواية الشخصية اللي تناسب أحداث المسلسل، واللي قرأ الروايات هيكون مدرك لخيوط الترابط بين الشخصيات والأحداث في الروايات والمسلسل.. ولو مقرأتهمش فاحنا هنقدملك تعريف بسيط لكل رواية فيهم.
القاهرة الجديدة
بتدور أحداثها في القاهرة المعاصرة وقتها في الأربعينيات من القرن الماضي، وبتحكي قصة شاب طموح بيؤمن بتحقيق نفسه، وهو من طبقة اجتماعية بسيطة، بيتخرج من الجامعة يدور على شغل فيقع في إيد واحد من كبار الموظفين في وزارة، وبيقنعه بالجواز من عشيقة أحد البهوات، فتتغير حياته ويدخل طبقة اجتماعية أعلى ويبتدي سلم المجد في حياته، وتتغير الأحداث وتتكشف القصة وتهز المجتمع المصري وبيتم نقل البطل لأسوان، والرواية اتحولت لفيلم القاهرة 30، من بطولة حمدي أحمد وسعاد حسني.
ثرثرة فوق النيل
الرواية بتدور أحداثها في عوامة على ضفاف النيل بالقاهرة، بيتجمع في العوامة دي مجموعة من الأصدقاء، شبه مفيش بينهم أي روابط غير تعاطي المخدرات والسُكر، والرواية بتتكون في صورة محادثة بينهم جوه العوامة، والبطل شبه فاقد العقل، لإنه يهلوس من بداية الرواية لآخرها، لكنه مثقف جدًا، لدرجة إن هلوسته لها طابع تاريخي، فبيبدأ يشوف شخصيات تاريخية أثناء الهلوسة، وأصدقاء العوامة كلهم مثقفين لكن بيعيشوا حياتهم بالطول والعرض، لكنهم بيفضلوا إنهم ميشاركوش في الحياة الجدية لإن من وجهة نظرهم الطغاة بيسيطروا على كل القرارات، ومشاركتهم مش مفيدة فقرروا يعيشوا حياة اللذة والعبث، والرواية اتعملت فيلم من بطولة عماد حمدي وأحمد رمزي وميرفت أمين وغيرهم من نجوم كبيرة.
الكرنك
الرواية بتتكلم عن فترة ما بين حرب النكسة وحرب أكتوبر، واسم الرواية بيرجع لقهوة الكرنك، اللي بيتجمع فيها شباب للقاءات ثقافية، وبتدور الأحداث مع الشخصيات وعلاقاتهم ببعض وتغيير مفهوم الحب والصداقة، الرواية اتنشرت سنة ١٩٧٤ بعد كده اتحولت لفيلم سينمائي سنة ١٩٧٥ من بطولة نور الشريف وسعاد حسني.
اللص والكلاب
الرواية مقتبسة من قصة حقيقية حصلت في الأسكندرية، بتدور أحداثها حول شخصية البطل سعيد وصديقه والبطلة نور اللي بيقع في حبها البطل، والرواية اتسمت اللص والكلاب لإن اللص بيرمز للبطل سعيد اللي حياته بتناقض اسمه، وبيواجه مشاكل كتير، والكلاب بترمز للمجتمع، لإن الشخصيات الثانوية في الرواية بتكشف عن تناقض أفعالها مع أقوالها وبيتخلوا عن البطل في النهاية، الرواية اتحولت لفيلم من بطولة شكري سرحان وشادية وكمال الشناوي.
الطريق
بتدور قصتها حول شاب مصري حياته كلها مشاكل، والدته رسمتله الطريق بكل تفاصيله، فكان الشاب ضحية القالب الجاهز السهل اللي عملته والدته لشدة حبها ليه، وكانت حياته في بيئة فساد واتعود البطل على الحياة دي وأصبح مبيعرفش يعتمد على نفسه نهائيًا، بعد كده بتدخل والدته السجن وبتضيع ثروتها، وبتعرف إن ساعاتها في الدنيا معدودة وبتوجه ابنها علشان يدور على والده، وبعدها بتتملي حياة البطل بالمشاكل نتيجة لحياته السابقة.