بمناسبة قطار مصر – السودان.. تعالوا نعرف المشاريع اللي بتربط الدول العربية ببعضها
من سنتين تقريبًا كان في اتفاق بين مصر والسودان على مسار خط سكة حديد بينهم، وده كان في الاجتماع التأسيسي الأول للمشروع، واللي انعقد بعد تلات شهور من زيارة الرئيس عبد الفتاح السيسي للسودان أخر شهر يوليو 2018، لكن المشروع اتأخر علشان البلدين كانوا بيحاولوا يوصلوا لأحسن تخطيط للمشروع، ولكن وزير النقل كامل الوزير وقع إمبارح وثيقة التعاون المشترك وتم الاتفاق على إحياء المشروع وتنفيذه.. وبالمناسبة دي هنتكلم عن أهم المشاريع اللي بتربط الدول العربية ببعضها.
1- سكك حديد بين مصر والسودان
المشروع يمتد بطول حوالي 900 كيلو متر جوه البلدين، والخط السككي هيبدأ من الأسكندرية لغاية أسوان وبعد كده للخرطوم، لكن المرحلة الأولى هتمتد من أسوان لغاية وادي حلفا بالسودان، والتمويل هيكون بالتنسيق بين مصر، والسودان، والصندوق الكويتي للتنمية الاقتصادية، والخط ده هيكون لنقل الركاب والبضائع مع بعض، والتنفيذ هيكون وفقًا لمواصفات السكك الحديدية المصرية، وهيبدأ بعد لما يخلصوا الدراسات الفنية للمشروع، وكمان في مخطط مستقبلي إن الخط ده هيربط كل الأراضي في البلدين.
2- جسر الملك سلمان البري (مصر – السعودية)
هو مشروع إنشاء جسر بري بين البلدين، أعلن عنه العاهل السعودي الملك سلمان بن عبد العزيز والرئيس عبد الفتاح السيسي في القمة المصرية السعودية في أبريل 2016، وهيسمح بمرور العربيات والشاحنات وكمان هيبقى فيه سكة قطار لنقل البضائع والركاب، وهيربط بين منطقة تبوك بالمملكة ومحافظة جنوب سيناء وهيمر بمدينة شرم الشيخ، والجسر ده هيأثر على حركة التجارة وكمان هيبقى ليه تأثير تنموي على شبه جزيرة سيناء، ومن المتوقع أن يبلغ حجم التجارة السنوي من الجسر 200 مليار دولار في السنة، وكمان متوقع أن يستغرق بناء الجسر اللي هتموله الحكومة السعودية من حوالي 5 لـ 8 سنين بتكلفة متوقعة تتراوح بين 4 – 5 مليار دولار، وكمان متوقع يكون طوله بين 7 لـ 10 كيلو متر.
3- جسر الملك فهد (السعودية – البحرين)
تم افتتاحه رسميًا في 25 من شهر نوفمبر سنة 1986 وهو بيربط بين السعودية والبحرين، وطوله حوالي 25 كيلو متر، وعرضه 23.2 متر، وبيبدأ من جنوب مدينة الخبر بالسعودية لغاية العاصمة البحرينية المنامة، والشيخ عيسى بن سلمان آل خليفة عاهل البحرين وقتها أطلق عليه اسم جسر الملك فهد أثناء الافتتاح نسبة إلى فهد بن عبد العزيز آل سعود، والجسر حقق فوائد اقتصادية كتيرة للبلدين، وفي سنة 2019 سجل الجسر أعلى رقم عبور في تاريخه وكان عدد المسافرين أكتر من 2.9 مليون مسافر.
4- سكة حديد دول مجلس التعاون الخليجي
هو مشروع معروف باسم “قطار الخليج” وهو مسار سكة حديد مُجهز بقاطرات، وبيربط بين دول مجلس التعاون الخليجي ببعضها كمشروع متكامل مع شبكات السكك الحديدية الداخلية، وبيبدأ من مدينة الكويت مرورًا بكل دول المجلس لحد ما يوصل لمدينة مسقط بسلطنة عمان، وبيهدف لتسهيل حركة التجارة بينهم وحركة السياح والركاب، وطوله 2117 كيلو متر، ومن المتوقع أن تكون تكلفته أكتر من 15.4 مليار دولار أمريكي.
5- القطار المغاربي
هو مشروع بيهدف للربط بين دول المغرب العربي، ومن المتوقع أن يربط في المرحلة الأولى بين تونس والجزائر والمغرب، وهيمتد في المرحلة التانية ليشمل موريتانيا وليبيا، وهيكون ليه تأثير اقتصادي كبير على المنطقة، بتكلفة 4 مليار دولار أمريكي، وطوله هيكون 2350 كيلو متر.