انتشرت على السوشيال ميديا مجموعة من الصور للفنانة اللبنانية “هيفاء وهبي” في مؤتمر صحفي قبل حفلتها في موسم الرياض، وانهالت التعليقات على صورها اللي سببت جدل كبير بين مستخدمين المنصات المختلفة.
كانت معظم التعليقات اللي جت على صور وهبي بتستغرب من تقدمها في السن، وده اللي فتح باب النقاش حوالين معنى التنمر على السوشيال ميديا ومفاهيم تقبل المجتمع لحقيقة تقدم الفنانين والمشاهير في السن، واللي خلى التعليقات فيها قدر من التنمر كان ظهور نبرة شماتة.
مداخلة تليفونية لهيفاء وهبي مع عمرو أديب
بعد الجدل الكبير اللي حصل على السوشيال ميديا بسبب صور وهبي، دخلت الفنانة في مكالمة هاتفية مع الإعلامي المصري “عمرو أديب” وقالت: “ربنا اداني نعم كتير وتستاهل الشكر، وكل ما هتنجح في حياتك هتكون مستهدف، وردي الحقيقي هو ظهوري قدام الملايين على الهواء مباشرة”.
ووصفت الموضوع بالتافه وأكدت إنه مش هيوقفها، وقالت: “حملة موجهة معروفة إن وراها أشخاص هو ده هدفهم، لأني كنت في بلد راقي جدًا، وفي حدث فني أتحسد عليه، فطبيعي يطلع لي أشخاص عايزين يعملوا شوية حركات”.
بين التنمر والدعم: هيفاء وهبي في مرمي السوشيال ميديا
في مقابل تعليقات التنمر اللي ملت منصات السوشيال ميديا على صور هيفاء وهبي، ظهرت موجة من الدعم القوي للفنانة سواء من الجمهور اللي بيحبها أو من زمايلها من الفنانين.
وانتقدت الجماهير لغة التنمر اللي واجهتها الفنانة اللبنانية على مواقع السوشيال ميديا، واستغربوا من إن الناس مش متقبلين حقيقة إن الفنانين والمشاهير هما بشر من لحم ودم وممكن يتقدموا في السن وملامحهم تتغير.
فيفي عبدو ظهرت في فيديو على ستوري انستجرام وقالت فيها: “متضايقة أوي من اللي بيقال عن هيفاء، يا جماعة هيفاء زي القمر مش عايزة كلام وهي من الستات الباربي، الإضاءة ماكانتش حلوة، هيا خاسة شوية ده لوك ومن حقها تغيّر من شكلها، أمال بتقلدوا الفنانين ليه”.
وأضافت: “إيه ده يا جماعة ليه كل السخرية والانتقادات إيه اللي عملته هيفاء؟ بسيطة المكان غير مناسب للتصوير علشان الأمن”.
هيفاء وهبي تدعم يسرا اللوزي في حملة التنمر على بنتها
قبل موجة التنمر الكبيرة اللي واجهتها هيفاء وهبي، كانت في اتصال تليفوني مع برنامج القاهرة اليوم، ووجهت رسالة للفنانة “يسرا اللوزي” بعد التنمر على بنتها الأسبوع اللي فات، وقالت إن ربنا أعطى البنت أحن أم في الدنيا.
وأضافت: “ربنا يحفظ بنتها وأكيد ربنا أعطاها أحن أم في العالم علشان متوصلهاش ده، وده مش عيب لأن أكيد الإنسان اللي عنده مشكلة في حياته يمكن يكون أحسن من 100 حد بيتنمر”.
وتابعت: “المهم ميأثرش هذا الأمر على البنت ولا على والدتها، فهي فنانة محبوبة جدًا، فأنا بعزها وبحبها وربنا يحمي بنتها”.
ووضحت: “وبعدين مش أحسن ما يكون البنت عندها مشكلة وأهلها قاسيين، فأمها حنينة عليها جدًا وبتقابل مجتمع مريض، مش لازم نستسلم للحكي، لازم نستسلم للناس اللي بتحبنا”.
وكملت: “وبعدين دي خلقة ربنا، فإذا سخرت منها بكرة هتشوف ربنا هيعمل فيك إيه، ربنا مش هيسبهم ولازم يكون في قوانين للسوشيال ميديا، اللي يفتح أكونت يفتحه بالبطاقة بتاعته، عشان لما شخص يتنمر يعاقب”.