انتشر على السوشيال ميديا فيديو لسعودي تايه في المغرب، وتفاعل معاه ناس كتير حاولت تعرف قصته وتنشر الفيديو علشان يتم إنقاذه، الفيديو ظهر فيه الشاب “فهد” بيحكي إنه فقد أوراقه الرسمية وجواز سفره وكمان فلوسه، ومش فاكر غير إنه من منطقة الباحة في جنوب السعودية، وإنه حاليًا عايش في سوق المحمدية في المغرب، وده سوق ملابس مستعملة. الفيديو أثار جدل عن حقيقته وعن كون “فهد” سعودي فعلًا ولا من بلد تانية.
ناس كتير من الوطن العربي نشرت الفيديو على أمل التعرف على الشاب والوصول لأهله، والتأكد من كونه مواطن سعودي فعلًا ولا لأ، لإنه واضح عليه علامات فقدان الذاكرة، وحصل مناشدات لمساعدته من السفارة السعودية والتعرف عليه، وفعلًا السفارة اتدخلت وأمير منطقة الباحة، الأمير حسام بن سعود، وجه أوامر للوصول للشاب السعودي والبحث عن أهله والتنسيق مع الجهات الحكومية المغربية والسعودية علشان يتم إنقاذه.
السفارة السعودية في المغرب أصدرت بيان عن الفيديو، قالت فيه إنها تابعت اللي تم تداوله على السوشيال ميديا عن المواطن السعودي اللي بيعاني من ظروف صحية صعبة وموجود في المغرب حاليًا، وإنهم بالفعل اتأكدوا من هوية فهد وتواصلوا مع أسرته في المملكة علشان يتأكدوا من أوراقه الرسمية اللي بتثبت كل ده، وكمان قدروا يحددوا مكان إقامته بالظبط بعد التنسيق مع السلطات المغربية.
فهد لسه مارجعش السعودية ولا رجع لأهله، لكن بفضل الفيديو وانتشاره تم التعرف على هويته والتحفظ عليه في مكان آمن تابع للسفارة السعودية، لحد ما تتم إجراءات عودته للمملكة ولأهله. القصة على قد ما في البداية تبان مأساوية، لكنها بتبين أهمية وقوة السوشيال ميديا اللي بنعرفها كل يوم أكتر من اللي قبله، واللي بتساعد في إنقاذ حياة ناس كتير، منهم دلوقتي فهد، اللي حياته هتتغير من شخص فاقد الهوية في بلد غير بلده وفاقد حتى أوراقه الرسمية، لحد هيرجع لبلده وأسرته.