كرة القدم من أكتر الرياضات الشعبية اللي مابيختلفش عليها ناس كتير، كبير وصغير بيحبها ومعروف عنها إنها بتجمع الناس وقادرة إنها تفرحك وتزعلك، عندها قدرة غريبة في التحكم في انفعالاتك، ويمكن هي الرياضة الوحيدة اللي لها شعبية وجماهيرية عالية في كل دول العالم، مش بس مصر. ونتيجة لحبنا الزيادة لكرة القدم ساعات الموضوع بييجي على حساب رياضات تانية فردية وجماعية مش بتحظى بنفس الشعبية دي، مع إنها تستحق وأبطالها ولاعبيها كمان يستحقوا، وزيّ ما مافيش رياضات معروفة بس مالهاش جماهيرية واسعة، في كمان رياضات غريبة ومش معروفة وعمرك ما سمعت عنها ولا اتلعبت قبل كده قدامك، وهو ده موضوعنا النهارده.
رياضة الكوي
بتعرف تكوي؟ الكوي بقى رياضة وبيتعمل فيها مسابقات في بريطانيا، تقدر تاخد المكواة بتاعتك وتكوي في أماكن صعبة وغريبة؛ فوق الجبل أو في الغابة أو تحت المياه أو فوق السحاب أو حتى بين العربيات وهي ماشية.
رياضة ملاكمة الشطرنج
ليك في الشطرنج؟ طب والملاكمة؟ طب إيه رأيك لو اتجمعوا مع بعض؟ اللعبة بتتكون من 11 جولة، 6 منهم للشطرنج و5 للملاكمة وكل جولة منهم مدتها 3 دقائق، وبيبقوا اتنين لاعيبة بيتناوبوا على اللعبتين. بيبدأوا بجولة الشطرنج، وبعدها بينزلوا الحلبة للملاكمة، وبعدين راحة لمدة دقيقة، ويكملوا شطرنج وهكذا. لعبة بتدمج ما بين الاتنين؛ الرياضة الذهنية والرياضة البدنية.
رياضة كرة قدم المستنقعات
تلعب في الطين؟ هي نفس لعبة كرم القدم اللي عارفينها، بس دي مش بتتلعب على أرض ثابتة أو نجيلة، لأ ده أنت بتلعبها في مستنقعات من الوحل والطين! والسبب الأساسي ورا صعوبتها هو إن طول الوقت أنت عمال بتقع ومش واقف، ودلوقتي بقوا بيدخلوا فيها مسابقات وبطولات كمان.
رياضة “شيل مراتك” أو “حمل الزوجات”
من أغرب الرياضات اللي اتعملت، بتشيل مراتك وتجري بها مسافات طويلة والفايز اللي يوصل الأول، بدأت في فينلندا وبقى يتعمل لها مسابقات رسمية واحتفالات في أوروبا.. تقريبًا في أوروبا ماعداش عليهم حاجة اسمها “الديسك”.
سباق دحرجة الجبنة
بيتجمع أهالي مدينة “غلوستر” في إنجلترا على قمة تل “كوبرز هيل” نهاية كل أسبوع من شهر مايو بشكل سنوي، وهما شايلين أنواع مختلفة من الجبنة علشان بطولة “دحرجة الجبن”، وشرط أساسي إن وزن الجبنة مايقلش عن 3 كجم، وبيبدأ كل واحد يدحرج قطعته من فوق الجبل، واللي يوصل الأول يبقى هو الكسبان.. دي اللي يتقال عليها رياضة بلا هدف.
وفي الأخر وبعد ما شوفنا مجموعة من الرياضات الغريبة، حبينا نقول شكرًا على نعمة كرة القدم وكل الرياضات التانية.