مُخرج فيلم “كباتن الزعتري” اللي شوفناه مترشح في مهرجانات مختلفة وكسب جوائز دولية، علي العربي، بنشوفه دلوقتي بحضور مميز ولكن مش كمخرج، المرة دي كممثل في مسلسل “منورة بأهلها” اللي بيتصنف دراما غموض، وبيتعرض حاليًا على منصة شاهد، وبنشوف علي العربي بيقدم شخصية قريبة جدًا من الواقع، ازاي؟
علي العربي بيمثل شخصية محمد أسامة، بطل الجمهورية في المصارعة واللي يبواجه مصير مجهول ومليان بالمخاطر بعد سفره من صعيد مصر للقاهرة مع أخوه الوحيد، سعيًا لحلمه وللمشاركة في بطولة الجمهورية للمصارعة الروماني. وبتتقلب حياته كلها بعد ما بقى هدف بتطارده عصابة بتقوم بأعمال غير مشروعة وغامضة، من ضمنهم المتاجرة في الأطفال حديثي الولادة، فبيلاقي نفسه في صراع بين التمسك بمبادئه وبين إنه يضطر ينفذ تهديد العصابة علشان ينقذ حياته وحياة أخوه.
المميز هو إن علي العربي بالفعل كان بطل الجمهورية في المصارعة، قبل احترافه في الإخراج والتمثيل، وده اللي خلّاه قادر يقدم الشخصية بطابع واقعي مش تمثيل. وكمان قدر يستعرض مهاراته في المصارعة في مشهد اتحول بسرعة لمشهد رعب ضمن أحداث المسلسل، بعد ما أجبرته العصابة إنه ينهي جولة مصارعة بقتل خصمه، علشان يرضي رغبة واحد من الأثرياء اللي بيستمتع بمشاهدة العنف!
المسلسل من تأليف محمد أمين راضي، وبطولة مجموعة كبيرة من النجوم وهما: ليلى علوي، وباسم سمرة، وغادة عادل، وأحمد السعدني، ومحمد حاتم، وسلوى خطّاب، وناهد السباعي، ورانيا يوسف، وسلوى محمد علي، وعباس أبو الحسن. وبتدور أحداثه عن جريمة قتل تم تقييدها ضد مجهول لعدم كفاية الأدلة، لكن وكيل النيابة آدم (أحمد السعدني) بيفتح ملف القضية من جديد علشان يبتدي رحلة في التعرف على عالم غريب وعلى أشخاص بتربطهم أسرار غامضة، اللي بيكتشفها من خلال قصاصات صور لقاها في منزل القتيل.
وعن علي العربي، منتج ومخرج مصري شاب، أسس شركة Ambient Light للإنتاج. وبدأ مشواره كمنتج ومخرج للأفلام الوثائقية في قناة ZDF الألمانية، وبعدها انطلق في إنتاج أفلام وثائقية قصيرة لمنصات دولية مهمة منها ناشيونال جيوجرافيك الشرق الأوسط.