شوفنا امبارح كوميكس كتير طلعت على هاني رمزي والناس ماكانتش فاهمة إيه اللي حصل، وده بعد ما ظهرت صورة له ومكتوب عليها “اغتيال ظابط من الموساد الإسرائيلي!” والناس مش عارفة إيه بيودي على فين، وبدأت خفة دم المصريين اللي بتظهر على أي موقف غريب بيحصل. طب الموضوع بدأ ازاي؟
الموضوع بدأ بتويت بعد ما اتعرضت أربيل في 13 مارس لقصف بـ 12 صاروخ، وبعد ساعات أعلن الحرس الثوري في إيران مسئوليته عن القصف، وقال إنه استهدف مركز للموساد، وقتل ظابط من الموساد اسمه هاني رمزي! وبعدها علق الكاتب والباحث السياسي العراقي “شاهو القرةداغي” على الخبر وسأل، في رأيكم الرد الإسرائيلي هيكون إيه على طهران بعد ما نجحت في إنها تقتل واحد من أخطر ظباط الموساد “هاني رمزي”، حسب مصادر قريبة من الموساد؟
لحد كده الموضوع تمام وتقول عادي تشابه أسماء وأنت بتقرا التويت، بس لما تعمل scroll down وتلاقي إن صورة الظابط الإسرائيلي اللي قالوا عليها هو سيد أبو العربي، الشخصية الشهيرة اللي مثلها هاني في فيلم أبو العربي، ساعتها تبدأ تقلق، هما كان قصدهم مين؟ هاني رمزي بتاعنا؟
وبعد ما انتشرت الصورة دي، الناس وهاني رمزي يسكتوا؟ لأ طبعًا، وقاموا بالواجب، والتويتات كانت من نوعية “هاني رمزي والموساد؟ أنت اتطوعت امتى يا هاني في الجيش الإسرائيلي؟ إيه اللي وداك هناك؟ ده أنت أبوك العربي كان شهيد في الحرب ياراجل!” تعالوا نشوف الكوميكس اللي اتعملت على الموضوع.
بعيدًا عن إن بعد كده الموضوع اتكشف إنه كان له بعد سياسي وكان خبر كاذب ومعلومات مُضللة ومحاولة من محاولات الناس اللي بتطبل وبتدعم إيران، واسم هاني رمزي دخل معاهم بالصدفة، احنا مبسوطين إن شخصية أبو العربي اللي بنحبها اتشهرت أكتر وأكتر على حس اللي حصل.